Եվրոպան պաշտպանում Է իրանական միջուկային ծրագրին վերաբերող համաձայնագիրը. Մերկել
ԵՐԵՎԱՆ, 19 ՀՈԿՏԵՄԲԵՐԻ, ԱՐՄԵՆՊՐԵՍ: Եվրամիությունը հանձնառու Է այն պայմանավորվածությունների կատարմանը, որոնք ձեռք են բերվել իրանական միջուկային ծրագրի շուրջ: Այդ մասին, ինչպես տեղեկացնում Է «Արմենպրես»-ը, հոկտեմբերի 19-ին հայտարարել Է Գերմանիայի կանցլեր Անգելա Մերկելը, որը ժամանել Է Բրյուսել՝ մասնակցելու ԵՄ-ի գագաթնաժողովին:
«Իրանական միջուկային ծրագրին վերաբերող համաձայնագրի թեման մեծ դեր Է խաղալու: Մենք պարզորոշ հասկանալ ենք տվել, որ հանձնառու ենք կատարելու այդ համաձայնագիրը»,-ասել Է ԳՖՀ-ի նախարարների կաբինետի ղեկավարը:
Իրանը եւ միջազգային բանակցորդների «վեցյակը» 2015 թվականի հուլիսի 14-ի գիշերը պատմական համաձայնության են հասել իրանական բազմամյա միջուկային հիմնախնդրի կարգավորման շուրջ: Երկարատեւ բանակցություններն ավարտվել են Գործողությունների համատեղ համապարփակ ծրագրի (ԳՀՀԾ) ընդունմամբ:
2016 թվականի հունվարի 16-ին հայտարարվել Է ԳՀՀԾ-ի իրականացումն սկսելու մասին, որին հավանություն Է տրվել ՄԱԿ-ի Անվտանգության խորհրդի բանաձեւով: Այդ ծրագիրը նախատեսում Է ավելի վաղ ՄԱԿ-ի ԱԽ-ի, ԱՄՆ-ի եւ Եվրամիության կողմից Իրանի նկատմամբ սահմանված տնտեսական ու ֆինանսական պատժամիջոցների վերացում: Փոխարենը Թեհրանը պարտավորվել Է սահմանափակել իր միջուկային գործունեությունը՝ այն դնելով միջազգային հսկողության ներքո, հաղորդել Է ՏԱՍՍ-ը:
Բաժանորդագրվեք մեր ալիքին Telegram-ում