ԵՐԵՎԱՆ, 19 ՀՈԿՏԵՄԲԵՐԻ, ԱՐՄԵՆՊՐԵՍ: Թուրքիայի զինված ուժերը զինտեխնիկայի հերթական խմբաքանակն են հասցրել թուրք-սիրիական սահման:

Այս մասին, ինչպես հաղորդում է «Արմենպրես»-ը, հայտնում է թուրքական «Անադոլու» լրատվական գործակալությունը:

Թուրքական զինտեխնիկայի այս նոր խմբաքանակը տեղակայվել է Թուրքիայի հարավային Հաթայ նահանգի Ռեյհանլը գավառում, ինչը անմիջականորեն սահմանակից է Սիրիայի Իդլիբ նահանգին:

Հոկտեմբերի 18-ին Ռեյհանլը գավառում տեղակայված թուրքական ստորաբաժանումներ է այցելել և ստուգումներ անցկացրել Թուրքիայի զինված ուժերի գլխավոր շտաբի պետ գեներալ Հուլուսի Աքարը:

Թուրքիայի ԶՈՒ-ն 2017-ի հոկտեմբերի 8-ին հետախուզական գործողություններ էր սկսել սիրիական Իդլիբ նահանգում, իսկ հոկտեմբերի 12-ին ներխուժել էր նահանգ և տեղակայվել Իդլիբ-Աֆրին սահմանային հատվածում:

Սեպտեմբերին Աստանայում սիրիական ճգնաժամի շուրջ բանակցություններում Ռուսաստանը, Իրանը, Թուրքիան,  պայմանավորվածություն են ձեռքբերել սիրիական Իդլիբում նույնպես «անվտանգության գոտի» ստեղծելու վերաբերյալ: Սիրիական կողմը պահանջում է, որ Թուրքիան դուրս բերի իր զորքերն Իդլիբից:

Թուրքական զորքեր ներկայում տեղակայված են նաև սիրիական Ջերաբլուս-Ազեզ հատվածում: