ԵՐԵՎԱՆ, 9 ՀՈԿՏԵՄԲԵՐԻ, ԱՐՄԵՆՊՐԵՍ: Ազգային ժողովի ՀՅԴ պատգամավոր Աղվան Վարդանյանը շաբաթվա տհաճ ու տգեղ իրադարձություն է համարում ԱԺ պատգամավորներ Արտաշես Գեղամյանի եւ Նիկոլ Փաշինյանի միջեւ տեղի ունեցած միջադեպը:

«Նման պահելաձեւերը ոչ միայն դատապարտելի են, այլեւ ափսոսանքով կարող եմ նշել, որ մարդիկ դառնում են չափից ավելի կանխատեսելի իրենց վարքագծերի եւ քայլերի մեջ: Կարծում եմ՝ մեր կանոնակարգը հնարավորություն է տալիս  հարցին իրավական առումով անդրադառնալու»,-«Արմենպրես»-ի հաղորդմամբ՝ Ազգային ժողովում լրագրողների հետ զրույցում նշեց Աղվան Վարդանյանը՝ չցանկանալով անդրադարձ կատարել պատգամավորներից եւ ոչ մեկի արտահայտություններին:   

Անդրադառնալով նոյեմբերի սկզբին ութ մարզերում կայանալիք ՏԻՄ ընտրություններին՝ նա  նշեց, որ ՀՅԴ-ն մասնակցելու է դրանց, առավելապես՝ ավագանիների ընտրությանը: «Մեր մարզային կառույցները զբաղված են ընթացիկ աշխատանքներով»,-եզրափակեց պատգամավորը:  

Ազգային ժողովի «Ելք» խմբակցության պատգամավոր Նիկոլ Փաշինյանը հոկտեմբերի 5-ին հայտարարել էր, որ ՀՀԿ խմբակցության պատգամավոր Արտաշես Գեղամյանը խորհրդարանի միջանցքում բռունցքներով հարձակվել է իր վրա, սակայն Արտաշես Գեղամյանը հերքել էր միջադեպը: