ՀՀ մշակույթի նախարարությունը կաջակցի մարզային գրադարաններին
ԵՐԵՎԱՆ, 7 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ մշակույթի նախարարությունը ֆինանսապես կաջակցի մարզային գրադարաններին: «Արմենպրես»-ի հաղորդմամբ, այս մասին Կոմիտասի թանգարան-ինստիտուտում Գրադարանավարների օրվան նվիրված միջոցառման ժամանակ ասաց ՀՀ մշակույթի նախարար Արմեն Ամիրյանը: Նրա խոսքով՝ ծրագիրն այժմ մշակման փուլում է: «Հաջորդ տարի մենք կաջակցենք այն համայնքների ղեկավարներին, ովքեր պատրաստ կլինեն ստեղծելու նոր գրադարան: Կաջակցենք եւ ֆինանսապես, եւ գրականություն, մեթոդական օգնություն տրամադրելով»,-ասաց նախարարը՝ հույս հայտնելով, որ ծրագիրը մարզերում գրադարանային գործին նոր շնչառություն կբերի:
Նախարար Ամիրյանն ուրախությամբ փաստեց, որ հաջորդ տարի հանրապետության մարզերում կաշխատի 10 գրաբուս: «Այդ գրաբուսները բացի գրավաճառ կետերից պետք է դառնան գրադարանային ծառայության կարեւորագույն մի հանգույց»,-հավելեց նա:
Բաժանորդագրվեք մեր ալիքին Telegram-ում