Նկարիչ Պետիկ Պետրոսյանի գեղանկարչական և գրաֆիկական գործերը ներկայացվեցին արվեստասերներին
ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: Բուլղարահայ նկարիչ Պետիկ Պետրոսյանի «Նավամատույցներ» խորագրով ցուցահանդեսում ներկայացված են ավելի քան 90 գեղանկարչական ու գրաֆիկական երկեր, որոնք պատմում են Հայաստանի, Սիլիստրայի գեղատեսիլ վայրերի ու գողտրիկ անկյունների մասին: Ցուցահանդեսի բացման հանդիսավոր արարողությունը տեղի ունեցավ հոկտեմբերի 3-ին Հայաստանի ազգային պատկերասրահում:
«Պետիկ Պետրոսյանի կտավներն առաջին անգամ են ցուցադրվում նրա հայրենիքում: Չունենալով բաձրագույն կրթություն` նա իր արվեստը կերտել է` հենվելով ռումինական նկարչության վրա: Պետրոսյանի աշխատանքներում նկատելի է նաև բուլղարացի նկարիչների ազդեցությունը»,-«Արմենպրես»-ի հաղորդմամբ` նշեց ցուցադրության համադրող Մարգարիտա Խաչատրյանը: Նա ընդգծեց, որ շեշտը դրել է նկարչի ստեղծած ծովային տեսարանների վրա: «Առանձին սրահում ներկայացված են ցամաքային պատկերները, սոցռեալիստական շրջանի աշխատանքները, Սիլիստրայի Սուրբ Աստվածածին հայկական առաքելական եկեղեցու սրբապատկերը, զարդանախշերի վերատպությունները»,-եզրափակեց նա:
Հայաստանում Բուլղարիայի արտակարգ և լիազոր դեսպան Մարիա Պավլովա Ցոցորկովայի խոսքով` ցուցահանդեսի «Նավամատույցներ» խորագիրը վերաբերում է Բուլղարիային, որը հայ ազգի համար ծանր ժամանակաշրջանում ապաստան է տրամադրել նկարչին: «Քանի որ այս տարի լրանում է Բուլղարիայի և Հայաստանի միջև դիվանագիտական հարաբերությունների հաստատման 25-ամյակը, ես չեմ կարող չընդգծել գեղանկարչի աշխատանքների հիմնական հաղորդագրությունների արդիականությունն ու վավերականությունը ներկայիս համատեքստում: Նրա անձնական և գեղարվեստական ժառանգությունը հարստացրել ու ամրապնդել են Բուլղարիայի և Հայաստանի միջև մշակութային երկխոսությունը»,-եզրափակեց դեսպանը:
Ընդգրկված էին աշխատանքներ նկարչի ընտանիքի և մասնավոր հավաքածուներից, Սոֆիայի, Վառնայի, Պլովդիվի պատկերասրահներից, բնանկարներ, քաղաքային ու ծովային տեսարաններ, ինչպես նաև մեկ սրբապատկեր և եկեղեցու զարդապատկերների վերատպություններ:
Ցուցահանդեսն իրականացվեց ՀԲԸՄ Հայաստանը` Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի հովանավորությամբ, Հայաստանում Բուլղարիայի Հանրապետության արտակարգ և լիազոր դեսպան տիկին Մարիա Պավլովա Ցոցորկովայի, Հայաստանի Ազգային պատկերասրահի և Սոֆիայի քաղաքային պատկերասրահի աջակցությամբ:Բաժանորդագրվեք մեր ալիքին Telegram-ում