ԵՐԵՎԱՆ, 25 ՍԵՊՏԵՄԲԵՐԻ, ԱՐՄԵՆՊՐԵՍ: Թուրք հաքերներից կազմված ASLAN NAFERLER TIM (A.N.T.) խմբավորումը կոտրել է Ֆրանսիայում Հայաստանի զբոսաշրջության գրասենյակի կայքէջը և տեղադրել իրենց էլեկտրոնային պաստառը։

Ինչպես «Արմենպրես»-ին տեղեկացրին Ֆրանսիայում Հայաստանի զբոսաշրջության գրասենյակից, սեպտեմբերի 24 առավոտյան թուրք հաքերներից կազմված ASLAN NAFERLER խմբավորումը կոտրել է destination-armenie.fr ֆրանսալեզու կայքը, որը Ֆրանսիայում և ֆրանկոֆոն երկրներում Հայաստանի զբոսաշրջության գրասենյակի կայքէջն է:

Նույն օրը, թուրք հաքերներից կազմված նույն խմբավորումը կոտրել է նաև Ֆրանսիայում Հայաստանի առևտրաարդյունաբերական պալատի կայքէջը www.cciarmenie.fr. Բարեբախտաբար, աշխատակիցների զգոնության և արդյունավետ աշխատանքի շնորհիվ հնարավոր է եղել կարճ ժամանակում վերականգնել կայքէջերի բնականոն աշխատանքը՝ չհաշված որոշ անսարքությունների, որոնք կվերականգնվեն սեղմ ժամկետներում: Այս երկու կազմակերպությունները, որոնք Ֆրանսիայում գործում են 2015 թվականից ի վեր, Հայաստանը ներկայացնող կառույցներ են։

Այս առիթով Ֆրանսիայում Հայաստանի առևտրաարդյունաբերական պալատի ներկայացուցիչ ու Ֆրանսիայում և ֆրանկոֆոն երկրներում Հայաստանի զբոսաշրջության գրասենյակի հիմնադիր Վարդան Գաբրիէլեանը խիստ դատապարտել է թուրքական այս անհեթեթ թշնամական արարքը, որը ևս մեկ անգամ ցույց է տալիս Թուրքիայի ճիգերը՝ամեն կերպ խոչնդոտներու Հայաստանի զարգացմանն ուղղված նախաձեռնություններին: