Առաջիկայում Հայաստանում նոր թանգարաններ կբացվեն
ԵՐԵՎԱՆ, 25 ՍԵՊՏԵՄԲԵՐԻ, ԱՐՄԵՆՊՐԵՍ: Բազմաթիվ ներդրումների արդյունքում այս և հաջորդ տարիների ընթացքում Հայաստանում նախատեսվում է գինու, փոստի և այլ թանգարաններ բացել: «Արմենպրես»-ի հաղորդմամբ` այս մասին սեպտեմբերի 25-ին լրագրողների հետ հանդիպմանն ասաց ՀՀ մշակույթի նախարար Արմեն Ամիրյանը:
Այս տարի Հայաստանի ազգային պատկերասրահում կբացվի նաև 360 աստիճան վիրտուալ թանգարանը:
«Նախագիծը պատրաստ է, և դրա շնորհանդեսն արդեն կայացել է: Այն ներկայացրել ենք ՀՀ վարչապետին: Թանգարանը 360 աստիճան համակարգով հայ կերպարվեստի բացառիկ նմուշները, լավագույն ստեղծագործությունները վիրտուալ հնարքներով և հայ դասական երաժշտության ուղեկցությամբ այցելուներին ցուցադրելու հնարավորություն կտա: Ներկայումս փնտրում ենք նոր գործընկերների, որոնց միջոցով հնարավոր կլինի թանգարանը կյանքի կոչել»,-ընդգծեց Արմեն Ամիրյանը:
Հայաստանում նաև գինու պատմության թանգարան է նախատեսվում բացել: Այդ նպատակով շուրջ 300 000 դոլար ներդրում է կատարվել: Բացումը նախատեսվում է հաջորդ տարի:
Անդրադառնալով Գյումրիում սպասվող նորություններին` նախարարն ասաց, որ Գյումրու Վարդան Աճեմյան 5 հասցեում կա մի հուշարձան, որի մի մասում գործում է տեղի մարզային գրադարանը: Ցանկանում ենք վերանորոգել ողջ շենքը և այդ կապակցությամբ ներդրվել է 1մլն 300.000 դոլար: Ծրագրի ինժեներատեխնիկական և վիրտուալ նախագծերը պատրաստ են, սակայն դեռ ներդրումներ են հարկավոր ցանկությունը հաջողությամբ իրականացնելու համար»,-ընդգծեց Ամիրյանը:
Նրա խոսքով նախատեսվում է շենքի մի մասում երկրաբանական թանգարան, իսկ մյուս մասում փոստի թանգարան և պատկերասրահ բացել:
Բաժանորդագրվեք մեր ալիքին Telegram-ում