Լոնդոնում անցկացվել է Հայաստանի անկախության 26-ամյակին նվիրված միջոցառում
ԵՐԵՎԱՆ, 25 ՍԵՊՏԵՄԲԵՐԻ, ԱՐՄԵՆՊՐԵՍ: Լոնդոնի հայկական Սուրբ Եղիշե եկեղեցում սեպտեմբերի 23-ին տեղի է ունեցել համերգ` նվիրված Հայաստանի Հանրապետության անկախության 26–ամյակին:
Ինչպես «Արմենպրես»-ին տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, միջոցառումը կազմակերպել էր Միացյալ Թագավորության Հայկական համայնքային խորհուրդը ՄԹ-ում ՀՀ դեսպանության և Հայաստանյայց Առաքելական եկեղեցու Մեծ Բրիտանիայի և Իռլանդիայի թեմի հովանու ներքո:
Միջոցառմանը ներկա են եղել Քենսինգտոն և Չելսի թագավորական շրջանի քաղաքապետը, տեղական իշխանության ներկայացուցիչներ, հայկական համայնքի անդամներ։
Ներկաներին իր ողջույնի խոսքն է հղել ՄԹ-ում ՀՀ դեսպանության ներկայացուցիչը, ով ամփոփել է Հայաստանի՝ անկախության 26 տարիների ընթացքում արձանագրված ձեռքբերումներն ու անդրադարձել ապագայի տեսլականին` կարևորելով Հայաստան–Սփյուռք համագործակցությունը։
Երեկոյի ընթացքում հայրենասիրական, ժողովրդական երգերի կատարումներով հանդես են եկել Հայաստանից հրավիրված երգչուհի Սոնա Ռուբենյանը, ինչպես նաև լոնդոնաբնակ երգիչ Անդրե Սիմոնյանը։
Բաժանորդագրվեք մեր ալիքին Telegram-ում