1000х90.jpg (78 KB)

Երևանում՝ 11:07,   28 Մարտ 2024

Երուսաղեմահայ բանաստեղծուհի Անուշ Նագգաշյանի «Այդ սերմը ես էի» գիրքը ներկայացվեց հայաստանցի ընթերցողների դատին

 Երուսաղեմահայ բանաստեղծուհի Անուշ Նագգաշյանի «Այդ սերմը ես էի» գիրքը 
ներկայացվեց հայաստանցի ընթերցողների դատին

ԵՐԵՎԱՆ, 22 ՍԵՊՏԵՄԲԵՐԻ, ԱՐՄԵՆՊՐԵՍ: Կոմիտասի անվան կամերային երաժշտության տանը Սեպտեմբերի 22-ին ՀՀ սփյուռքի նախարարության և Հայաստանի գրողների միության նախաձեռնությամբ տեղի ունեցավ երուսաղեմահայ բանաստեղծուհի, արձակագիր, հրապարակախոս Անուշ Նագգաշյանի «Այդ սերմը ես էի» գրքի շնորհանդեսը:

 Ինչպես «Արմենպրես»-ին տեղեկացրին ՀՀ սփյուռքի նախարարության տեղեկատվության և հեռահաղորդակցության վարչությւոնից, միջոցառմանն իր օրհնության խոսքը բերեց Հայր Կոմիտաս Վարդապետ Հովնանյանը:

ՀՀ սփյուռքի նախարար Հրանուշ Հակոբյանը շնորհավորանքի խոսքը փոխանցեց նախարարի տեղակալ Սերժ Սրապիոնյանը` նշելով. «Անուշը մեզ հետ ու մեր կողքին է նույնիսկ այն ժամանակ, երբ անգամ Հայրենիքում չէ, իսկ երբ գալիս է Հայրենիք, իր հետ բերում է ողջ Սփյուռքը: Այս գրքում ներկայացնելով մեծ մոր` Աննա Նագգաշյանի` Հայոց ցեղասպանությունից փրկվելու և ողբերգությունը վերապրելու ողջ ուղին` Անուշը տառապող հայի կերպարը չէ, որ կերտում է, այլ` արժանապատիվ ու հպարտ հայի»:

Լուսանկարները` Էդուարդ Սեպետչյանի

Սերժ Սրապիոնյանն ընդգծեց, որ Անուշի մեծ մոր անցած ուղին հենց Անուշի ուղին է, քանի որ մանկուց լսելով տատի պատմությունները` Անուշն ինքը դրանք վերապրել է: «Մեծ մայրը իր զավակին` Անուշի հորը հեռու է պահում օտարազգի կնոջ հետ ամուսնանալու մտքից` որդուն հղված հեռագրի միջոցով, որում նշված էր. «Տղա՛ս, Հայաստանի զինվոր չեղար, Հայրենիքի համար արյուն չթափեցիր, սերմդ օտարի՞ն պիտի տաս»: Հասկանալով, որ այդ սերմը հենց ինքն է` Անուշ Նագգաշյանն իր պարտքն է համարում թղթին հանձնել տատի պատմությունը: Արդյունքում` այժմ մեր ձեռքին է գեղարվեստական և սկզբնաղբյուրային կարևոր արժեք ներկայացնող այս պատմությունը», - նշեց նախարարի տեղակալը:

Արևելագիտության ֆակուլտետի դեկանի տեղակալ, թուրքագետ Ռուբեն Մելքոնյանը ընդգծեց, որ Անուշ Նագգաշյանի գիրքն ունի քաղաքական, պատմագիտական-սկզբնաղբյուրային նշանակություն:

ԵՊՀ Հայ գրականության պատմության ամբիոնի վարիչ, պրոֆեսոր Սամվել Մուրադյանը, շնորհակալություն հայտնելով ՀՀ սփյուռքի նախարարությանը շնորհանդեսը կազմակերպելու համար` նշեց, որ գրքում տեսնում է ոչ միայն հեղինակ վավերագրողին, այլև` գեղագետին:

Երևանի պետական մանկավարժական համալսարանի ,Սփյուռքե գիտա-ուսումնական կենտրոնի հիմնադիր-տնօրեն, պրոֆեսոր Սուրեն Դանիելյանն ընդգծեց, որ Անուշ Նագգաշյանի հետ յուրաքանչյուր հանդիպումը գրականագետի և գրողի լավագույն երկխոսություն է: «Գրքով ակնհայտ է դառնում, որ Անուշը պատասխանատվություն է զգում ժամանակի հանդեպ, և այս ստեղծագործության մեջ զգում ենք էպիկականության շունչը», - նշեց Սուրեն Դանիելյանը:

Ելույթ ունեցավ նաև ԵՊՀ Հայոց լեզվի պատմության ամբիոնի դոցենտ Նորայր Պողոսյանը: Հեղինակի գրքից հատվածներ ընթերցեցին Հայաստանի վաստակավոր արտիստ Սարգիս Նաջարյանը և Վաղարշապատի Ռ.Պատկանյանի անվան թիվ 9 հիմնական դպրոցի սաները:

Շնորհանդեսի ավարտին ելույթ ունեցավ հեղինակը` Անուշ Նագգաշյանը: Շնորհակալություն հայտնելով Սփյուռքի նախարարությանը` միջոցառումը կազմակերպելու համար, և Հոգեշնորհ Տեր Ղևոնդ Վարդապետ Հովհաննիսյանին` գրքի տպագրությանն աջակցելու համար` հեղինակը նշեց, որ առանձնակի պատասխանատվությամբ է մոտեցել գրքի ստեղծմանը: «Ես խոնարհվում եմ իմ մեծ մոր` Աննա Նագգաշյանի հիշատակի առջև և համարում եմ, որ սրանով իմ պարտքը կատարեցի նրա հանդեպ: Մեծ մայրս ինձ խոստացել էր` մինչ իր մահը պատմել կյանքի ողջ պատմությունը և այդպես էլ արեց: Պատմությունն ավարտելուց մեկ ամիս անց մահացավ: Նրան և պապիս թուրքերը հարկադրաբար վտարեցին մեր Հայրենիքից` Կեմերեկից: Բայց այսօր ես Հայաստան եմ կանչել աշխարհասփյուռ իմ բոլոր զարմիկներին ու զարմուհիներին, նրանց զավակներին ու թոռներին: Այսօր ես հայտնում եմ, որ նոր Կեմերեկ ստեղծեցինք այստեղ` մեր մայր հողի վրա: Դրա համար ցանկացա, որ այս գրքի շնորհանդեսը տեղի ունենա իմ Հայաստանում», - ասաց Անուշ Նագգաշյանը:

Այնուհետև հեղինակը բեմ հրավիրեց իր զարմիկներին և զարմուհիներին: Միջոցառումն ավարտվեց գրքի գինեձոնով:


Բաժանորդագրվեք մեր ալիքին Telegram-ում






youtube

AIM banner Website Ad Banner.jpg (235 KB)

Բոլոր նորությունները    


Digital-Card---250x295.jpg (26 KB)

12.png (9 KB)

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]