Գերմանական 3 քաղաքներում Ադրբեջանի դեմ բողոքի ակցիաներ են կազմակերպվել
ԵՐԵՎԱՆ,22 ՍԵՊՏԵՄԲԵՐԻ, ԱՐՄԵՆՊՐԵՍ: Ադրբեջանից փախստականի կարգավիճակով Գերմանիայում հաստատված ադրբեջանցիները գերմանական 3 քաղաքներում սեպտեմբերի 22-ին իրենց հայրենիքի դեմ ուղղված բողոքի ակցիաներ են անցկացրել:
Այս մասին, ինչպես հաղորդում է «Արմենպրես»-ը, հայտնում է ադրբեջանական azadliq.org-ը:
Գերմանիայի Մայնց, Մյունստեր և Անսբախ քաղաքներում տեղի ունեցած ակցիաները կազմակերպվել են ադրբեջանական ընդդիմադիր «Մուսավաթ» կուսակցության Եվրոպայի համակարգող կենտրոնի կողմից:
Ակցիայի մասնակիցները սուր քննադատության են ենթարկել գերմանացի և այլ եվրոպական երկրների այն պաշտոնյաներին, ովքեր տարբեր ժամանակներում կաշառքներ են ստացել ադրբեջանական իշխանություններից և որոնց անունները բացահայտվում են «Ադրբեջանական լվացքատուն» կոռուպցիոն սկանդալի շրջանակներում:
Գերմանական հեղինակավոր Զյուդդոյչե Ցայտունգ (Süddeutsche Zeitung) օրաթերթում սեպտեմբերի 19-ին լույս է տեսել «Ադրբեջանի կապը ՔԴՄ կուսակցության պատգամավորի հետ» վերնագրով հոդված:
Թերթի հոդվածի համաձայն` Քրիստոնեա-դեմոկրատական կուսակցության անդամ, Բունդեսթագի պատգամավոր Կարին Շտրենցը գումար է ստացել ինչ-որ ընկերությունից, որն ակնհայտորեն վճարովի լոբբիստական գործունեության է մատուցել Ադրբեջանի իշխանություններին:
Կարին Շտրենցը 2009թ.-ից ԳԴՀ Բունդեսթագի պատգամավոր է: Նա արդեն վաղուց համարվում է Ադրբեջանի ակնհայտ լոբբիստն ու աջակիցը: Նրա համացանցային կայքի գլխավոր էջում նրա լուսանկարն է նախագահ Իլհամ Ալիևի հետ:
Բաժանորդագրվեք մեր ալիքին Telegram-ում