Սոցփաթեթի շահառուները ապահովագրական ընկերությունների հետ խնդիրների դեպքում կարող են դիմել ֆինանսական համակարգի հաշտարարին
ԵՐԵՎԱՆ, 22 ՍԵՊՏԵՄԲԵՐԻ, ԱՐՄԵՆՊՐԵՍ: Սոցփաթեթի շահառուները ապահովագրական ընկերությունների հետ խնդիրներ ունենալու դեպքում հոկտեմբերի 1-ից կարող են դիմել ֆինանսական համակարգի հաշտարարի գրասենյակ: Այս մասին «Արմենպրես»-ի մամուլի սրահում հրավիրված ասուլիսում նշեց ՀՀ առողջապահության նախարարի տեղակալ Սամվել Մարգարյանը:
« Հիմա ապահովագրական ընկերությունների միջոցով այս գործուն մեխանիզմը միացրել ենք ծրագրին: Ինչու եմ ասում գործուն, որովհետև օրենքով մենք պարտադրել ենք ապահովագրական ընկերություններին համաձայագիր ստորագրել ֆինանսական համակարգի հաշտատարի հետ, որ ինքը պարտավորվում է հրաժարվել բողոքարկման իրավունքից: Ի՞նչ է դա նշանակում. եթե վեճ է առաջանում, քաղաքացին դիմում է հաշտարարին, վերջինս 10-օրյա ժամկետում կայացնում է որոշում, իսկ ապահովագրական ընկերությունն այն չի բողոքարկում, որովհետև կամովին հրաժարվել է դրանից»,-ասաց Սամվել Մարգարյանը:
Նախարարի տեղակալը նշեց, որ երկրորդ տարվանից սկսած, ֆինանսական համակարգի հաշտարարին դիմելության ցուցանիշներով պայմանավորված, ավելացնելու կամ պակասեցնելու են շուկայում ապահովագրական ընկերության տեսակարար կշիռը: Եթե ապահովագրական ընկերության բողոքները շատ եղան, ապա զրկվելու է շահառուներից:
Բաժանորդագրվեք մեր ալիքին Telegram-ում