ԵՐԵՎԱՆ, 22 ՍԵՊՏԵՄԲԵՐԻ, ԱՐՄԵՆՊՐԵՍ: Գյումրիի «Շիրակ» օդանավակայանի նկատմամբ հետաքրքրությունն օր օրի ավելանում է՝ թե այնտեղ արդեն իսկ ներկայացված ավիաընկերությունների, թե նոր ավիաընկերությունների կողմից: Սեպտեմբերի 22-ին կայացած մամուլի ասուլիսի ընթացքում լրագրողների հետ հանդիպմանն այս մասին ասաց ՀՀ կառավարությանն առընթեր քաղաքացիական ավիացիայի գլխավոր վարչության պետ Սերգեյ Ավետիսյանը:

«Եվ ամենաուրախալին այն է, որ ավիաընկերությունները ցանկանում են «Շիրակ» օդանավակայան մուտք գործել ոչ թե «Զվարթնոց» օդանավակայանում չվերթները նվազեցնելու հաշվին, այլ առհասարակ չվերթների թիվը մեծացնելու, չվերթները դիվերսիֆիկացնելու համար»,- «Արմենպրես»-ի փոխանցմամբ` ընդգծեց Ավետիսյանը:

Նա հավելեց, որ կյանքը ցույց է տվել, որ «Շիրակ» օդանավակայանում ուղևորահոսքի աճը չի եղել «Զվարթնոց»-ի ուղևորահոսքի նվազման հաշվին: «Շատերն էին մտածում, որ դա տեղի է ունենում «Զվարթնոց» օդանավակայանի ուղևորահոսքի նվազման հաշվին, սակայն այդպես չեղավ»,- ասաց Սերգեյ Ավետիսյանը` հավելելով, որ ուղևորահոսքի կայուն աճ կա և «Շիրակ» օդանավակայանում, և «Զվարթնոց» օդանավակայանում: