Վարչապետը խորհրդակցության միջոցով անդրադառնալու է հանձնարարականների իրականացման հաշվետվությանը
ԵՐԵՎԱՆ, 22 ՍԵՊՏԵՄԲԵՐԻ, ԱՐՄԵՆՊՐԵՍ: Կառավարության աշխատակազմի ղեկավարը ՀՀ վարչապետ Կարեն Կարապետյանին զեկուցել է, որ հանրապետական գործադիր մարմինների ղեկավարներին իր կողմից տրվել է շուրջ 260 հանձնարարական։ Հաշվի առնելով հանձնարարականների միջոցով բարձրացված հարցերի և հիմնախնդրների կարևորությունը՝ վարչապետը նշեց, որ անհրաժեշտ է համարում անդրադառնալ դրանց կատարողականների հսկողությանը և արձանագրված արդյունքներին:
«Արմենպրես»-ի փոխանցմամբ, այդ նպատակով Կարեն Կարապետյանը կառավարության աշխատակազմի ղեկավարին հանձնարարեց մինչ սեպտեմբերի վերջ ամփոփել և ներկայացնել տրված հանձնարարականների կատարողականի հսկողության արդյունքները և նշվածի վերաբերյալ կազմակերպել հանրապետական գործադիր մարմինների ղեկավարների մասնակցությամբ խորհրդակցություն:
Վարչապետը մարզպետներին հանձնարարեց մեկշաբաթյա ժամկետում մեկ տարվա ընթացքում կատարված աշխատանքների, այդ թվում՝ ներդրումային ծրագրերի, ստեղծված աշխատատեղերի, սեփական եկամուտների, աղբահանության և այլ հայտանիշների, որոնք հստակ ձևակերպվել են, ինչպես նաև ընթացիկ միջոցառումների վերաբերյալ հանրությանը ներկայացնել հաշվետվություն:
Բաժանորդագրվեք մեր ալիքին Telegram-ում