Ժամանակը Երևանում՝ 11:07:36,   16 Դեկտեմբեր

Անաչառության և օբյեկտիվության պահպանում. Լիբանանի «Զարթոնք» օրաթերթը տոնում է իր 80-ամյակը


ԵՐԵՎԱՆ, 21 ՍԵՊՏԵՄԲԵՐԻ, ԱՐՄԵՆՊՐԵՍ: Անաչառության և օբյեկտիվության պահպանում, տասնամյակներ շարունակ հավատարիմ՝ ի սկզբանե որդեգրած սկզբունքներին: Այսպես բնորոշեցին Լիբանանի «Զարթոնք» օրաթերթի անցած ուղին մտավորականները, գիտնականներն ու հասարակական գործիչները: Հայաստանի ազգային գրադարանում հանդիսավորությամբ նշվեց «Զարթոնք» օրաթերթի հիմնադրման 80-ամյակը: Օրաթերթի աշխատակիցները, գործընկերներն իրենց շնորհավորական խոսքն էին հղում՝ անդրադառնալով օրաթերթի ձեռքբերումներին:     

Լուսանկարները` Էդուարդ Սեպետչյանի

ՀՀ սփյուռքի փոխնախարար Սերժ Սրապիոնյանի խոսքով, այս թերթն, գործունեության 80 տարիների ընթացքում, անխոնջ ծառայել է իր երկրին ու ժողովրդին:

«Անկախ նրանից, թե ինչ ժամանակաշրջան է, այս թերթը կանգնած է եղել Հայաստանի, հայ ժողովրդի կողքին: Կապ չի ունեցել, թե ովքեր են եղել խմբագիրները, թղթակիցները, ինչ համաշխարհային տեղաշարժեր են գրանցվել, «Զարթոնք»-ը հավատարիմ է մնացել իր սկզբունքներին»,-ասաց Սերժ Սրապիոնյանը: Փոխնախարարն ընդգծեց, որ այն կարող է լավ օրինակ լինել այլ լրատվամիջոցների համար:

Բերիո Հայոց թեմի առաջնորդ Գերշ. Տ. Շահան Արք. Սարգիսյանը «Արմենպրես»-ի հետ զրույցում նշեց, որ «Զարթոնք» օրաթերթի գոյությունը պարզապես տեղեկատվություն հաղորդել չէ, այն շատ ավելի լուրջ գործ է արել հայ համայնքում:

«Նշեմ, հիմանական երկու ուղղությամբ կատարած աշխատանքը՝ ազգային գիտակցության բարձրացում, ազգային արժեքների դաստիարակություն:Այդ ամենը ենթադրում է հայեցի կրթություն, հայոց լեզվի պահպանում և զարգացում: Այս տարիների ընթացքում թերթն առանձնացել է նաև ապագայի նկատմամբ լավատեսություն դրսևորելու տեսանկյունից»,-ասաց Բերիո Հայոց թեմի առաջնորդ Գերշ. Տ. Շահան Արք. Սարգիսյանը:

Թերթն այս ամենին հասել է բազմաթիվ դժվարությունների միջով անցնելով: Տ. Շահան Արք. Սարգիսյանը նկատեց, որ Սփյուռքում ընթերցողին հայալեզու մամուլի կողքը պահելն արդեն բարդ է: Կան նաև ֆինանսական դժվարություններ մամուլը պահելու տեսանկյունից: Դրանից բացի, էլեկտրոնային մամուլի զարգացմանը զուգահեռ տպագիր մամուլը որոշակի հետընթաց է ապրում:

«Դժվարություններ նախկինում եղել են, ներկայում էլ կան: Արդյո՞ք  պետք է փակել այն: Իհարկե, ոչ: Ամեն գնով պետք է պահել մամուլը, որովհետև այն հայ խոսքը փոխանցողն է»,- ասաց Տ. Շահան Արք. Սարգիսյանը:

Այլ երկրում 80 տարի օրաթերթը հրատարակելն արդեն հերոսություն է: Հայաստանի Ազգային գրադարանի տնօրեն Տիգրան Զարգարյանի դիտարկումն է:

«Թերթ հրատարակելը տաժանակիր աշխատանք  է՝ նյութեր հավաքել, խմբագրել, սրբագրել, շարել, թղթակիցների, ընթերցողների հետ աշխատանք տանել և դա ամեն օր: Դա արվում է այլ երկրում հանուն հայ մարդկանց հայեցի դաստիարակության: Փորձը ցույց է տալիս՝ այն համայնքներում, որտեղ կա հայկական մամուլը, հայոց լեզվի պահպանումը շատ ավելի բարձր մակարդակի վրա է»,-ասաց Տիգրան Զարգարյանը:

«Զարթոնք»-ն իր գործունեության տարիներին ուշադրության կենտրոնում է պահել ինչպես հայերին առնչվող խնդիրները, այնպես էլ միջազգային կարևոր իրադարձությունները: Թերթի գլխավոր խմբագիր Սևակ Հակոբյանը «Արմենպրես»-ի հետ զրույցում նշեց, որ առաջիկայում էլ շարունակելու են աշխատանքը նույն սկզբունքներով:

«Սփյուռքում 80 տարի հայերեն թերթի գոյությունն արդեն հաղթանակ եմ համարում: Թերթը բազմաթիվ իրադարձությունների է անդրադարձել՝ պահպանելով օբյեկտիվությունն ու անաչառությունը»,-ասաց Սևակ Հակոբյանը:

 Այսօր թերթը, որպես տպագիր մամուլ, որոշ դժվարությունների առաջ է կանգնած: Սևակ Հակոբյանն ընդգծեց, նույնիսկ մեկ ընթերցողի դեպքում թերթը տպագրվելու է՝ զուգահեռաբար օգտագործելով էլեկտրոնային նորագույն միջոցները: Սևակ Հակոբյանը տեղեկացրեց, որ սկսում են թերթի արխիվի թվայնացման գործընթաց:



Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ