Մարտունի քաղաքում մեկնարկում է «Ոսկեփորիկ» գեղագիտական կենտրոնի ուսումնական եռամյա ծրագիրը
ԳԱՎԱՌ, 7 ՍԵՊՏԵՄԲԵՐԻ, ԱՐՄԵՆՊՐԵՍ: Գեղարքունիքի մարզի Մարտունի քաղաքի մշակույթի տանը գործելու է «Ոսկեփորիկ» գեղագիտական զարգացման կենտրոնի կրթական եռամյա ծրագիրը, որտեղ գեղագիտական կրթություն ստանալու հնարավորություն կունենան 3-15 տարեկան երեխաներ:
Ինչպես «Արմենպրես»-ին տեղեկացրեց Մարտունու քաղաքապետարանի մամուլի քարտուղար Լիլիթ Գեւորգյանը, պայմանավորվածությունը ձեռք է բերվել Մարտունու քաղաքապետ Արմեն Ավետիսյանի եւ «Ոսկեփորիկ» գեղագիտության զարգացման կենտրոնի հիմնադիր Էկա Հորստկայի միջեւ: Ինչպես ներկայացրեց կենտրոնի տնօրենը, ծրագիրը կրթական է, սակայն՝ ավանդական նորմերից դուրս: Այն չի լինելու կրտսեր դպրոց, այլ զարգացնելու է երեխայի ընդհանուր գեղագիտական մտածելակերպը, փոքրիկին տալու է հնարավորություն՝ ճանաչելու նաեւ սեփական բնօրրանի մշակութային իրողությունները: Ծրագիրն ուղղված է տարիքային տարբեր խմբերի երեխաների ընդհանուր գեղագիտական դաստիարակությանը:
«Կենտրոնն առաջարկելու է տարբեր տարիքային խմբերի համար նախատեսված 3 ուսումնական տարվա հեղինակային ծրագիր, որը ներառում է երաժշտության, կերպարվեստի, թատրոնի, կինոյի, լրագրության, ազգագրության, առողջ ապրելակերպի եւ բնապահպանության ընդհանրական ծրագրեր»,- ներկայացրեց Լիլիթ Գեւորգյանը:
Գեղագիտության դասերը վարելու է մանկավարժ, օպերային երգչուհի Անի Ադիլխանյանը:
Խոսրով Խլղաթյան
Բաժանորդագրվեք մեր ալիքին Telegram-ում