Նախարարության շենքում ռումբի առկայության մասին ահազանգը կեղծ էր
ԵՐԵՎԱՆ 1 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ տրանսպորտի, կապի և տեղեկատվական տեխնոլոգիաների նախարարության շենքում ռումբի առկայության մասին ահազանգը կեղծ էր: Լրագրողների հետ զրույցում այս մասին ասաց Երևանի փրկարար ծառայության պետի տեղակալ Առլեն Բադալյանը:
«Շենքի բոլոր սենյակները ստուգված են, որեւէ բան չենք հայտնաբերել: Ահազանգը կեղծ էր: Նախարարության աշխատակիցները հանգիստ կարող են վերադառնալ իրենց աշխատանքին»,- «Արմենպրես»-ի փոխանցմամբ՝ ասաց նա:
Ահազանգը ստանալուց հետո դեպքի վայր են ժամանել Երեւանի փրկարար ծառայության մեկ մարտական հաշվարկ, փրկարար ծառայության հատուկ նշանակության ջոկատի մեկ մարտական հաշվարկ, ոստիկանության քրեագետները եւ սակրավորներ: Շենքի ստուգման աշխատանքները տեւել են մոտ 2 ժամ:
Ոստիկանությունից «Արմենպրես»-ի հետ զրույցում տեղեկացրին, որ ահազանգի հեղինակի մասին պաշտոնական տեղեկատվություն կտրամադրեն ավելի ուշ:
Բաժանորդագրվեք մեր ալիքին Telegram-ում