Ժամանակը Երևանում՝ 11:07:36,   25 Սեպտեմբեր

Դատապարտյալը պարբերաբար լքել է ՔԿՀ տարածքը. աշխատակիցների նկատմամբ քրգործ է հարուցվել


ԵՐԵՎԱՆ, 23 ՕԳՈՍՏՈՍԻ, ԱՐՄԵՆՊՐԵՍ: «Արթիկ» ՔԿՀ-ի բաց ուղղիչ հիմնարկի դատապարտյալի առողջությանը ծանր վնաս պատճառելու դեպքի առթիվ ՀՀ քննչական կոմիտեի Շիրակի մարզային քննչական վարչությունում հարուցված քրեական գործով ձեռնարկված քննչական գործողությունների արդյունքում բացահայտվել է ՔԿՀ-ի պաշտոնատար անձանց կողմից պաշտոնեական լիազորությունները չարաշահելու դեպք: Այս մասին «Արմենպրես»-ին տեղեկացրին ՀՀ քննչական կոմիտեից՝ հավելելով. «Ավելի վաղ տեղեկացրել ենք, որ 2017թ. հուլիսի 20-ին Գյումրի քաղաքի Խրիմյան Հայրիկ փողոցում տեղի էր ունեցել վիճաբանություն, որի  ժամանակ  «Արթիկ» ՔԿՀ-ի բաց ուղղիչ հիմնարկի դատապարտյալն ստացել էր կյանքի համար վտանգավոր մարմնական վնասվածքներ և տեղափոխվել բժշկական կենտրոն:

Դեպքի առթիվ ՀՀ ՔԿ Շիրակի մարզային քննչական վարչությունում  ՀՀ քրեական օրենսգրքի 112-րդ հոդվածի 2-րդ մասի 6-րդ կետի հատկանիշներով հարուցված քրեական գործով ձեռնարկված բազմակողմանի քննության արդյունքում բավարար փաստական տվյալներ են ձեռք բերվել՝ «Արթիկ» ՔԿՀ առանձին աշխատակիցների կողմից պաշտոնեական լիազորությունները չարաշահելու վերաբերյալ։

Մասնավորապես՝ նախնական քննությամբ պարզվել է, որ դատապարտյալը պարբերաբար լքել է «Արթիկ» քրեակատարողական հիմնարկի տարածքը, իսկ ՔԿՀ-ի պատասխանատու պաշտոնատար անձինք, հաստատապես տեղեկացված լինելով  այդ մասին, միջոցներ չեն ձեռնարկել՝ նրա ոչ իրավաչափ վարքագիծը կանխելու ուղղությամբ,  ինչն էլ առաջացրել է ծանր հետևանքներ:

Ձեռք բերված բավարար փաստական տվյալների հիման վրա՝ ՀՀ ՔԿ Շիրակի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 308-րդ հոդվածի 2-րդ մասի հատկանիշներով:

Քրեական գործն ուղարկվել է ըստ քննչական ենթակայություն՝ ՀՀ հատուկ քննչական ծառայություն։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով»:

 



Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 10 539818
Էլ-փոստ՝ [email protected]
Яндекс.Метрика
Էջի կարգավորումներ