Անհատ ձեռնարկատերերի համար էլեկտրական չորանոցներ ձեռք բերելու արտոնյալ պայմաններ են ստեղծվել
ԵՐԵՎԱՆ, 26 ՀՈՒԼԻՍԻ, ԱՐՄԵՆՊՐԵՍ: «Սուրեն-Անի» ՍՊԸ-ի տնօրեն Սուրեն Գալստյանը և «ՓՄՁ ներդրումներ» ՈՒՎԿ ՓԲԸ-ի գործադիր տնօրենի տեղակալ Հրաչ Դարբինյանը հուլիսի 26-ին ստորագրեցին պայմանագիր՝ էլեկտրական չորանոցների իրացման ուղղությամբ համագործակցության վերաբերյալ: «Արմենպրես»-ի հաղորդմամբ` կողմերի համագործակցությունը նպատակ ունի աջակցել անհատ ձեռնարկատերերին և առևտրային իրավաբանական անձանց արտոնյալ պայմաններով էլեկտրական չորանոցներ ձեռք բերելու համար:
«Այս պայմանագրով մեր ընկերությունը հնարավորություն ստացավ ձեռք բերել էլեկտրական չորանոցներ և ֆինանսական վարձակալությամբ տրամադրել շահառուներին: Տվյալ գործարքը կնպաստի գյուղմթերքի վերամշակման գործընթացի ավելի զարգացմանը և արտահանման ավելացմանը, քանի որ հայկական չարազեղենը մեծ պահանջարկ ունի արտասահմանում»,- ասաց Դարբինյանը:
Նրա խոսքով` ֆինանսական վարձակալությամբ տրամադրվելու է էլեկտրական չորանոց՝ 1 տարի առավելագույն ժամկետով, տարեկան 12 տոկոս տոկոսադրույքով և առնվազն լիզինգի առարկայի արժեքի 20 տոկոսի չափով կանխավճարով:
«Էլեկտրական չորանոցները բավականին էժան են` նույն տեխնիկական բնութագիր ունեցող արտասահմանյան այլ չորանոցների համեմատ»,- ասաց Դարբինյանը:
Գյուղատնտեսության նախարարի տեղակալ Ռոբերտ Մակարյանի խոսքով` նմանատիպ գործընթացները շարունակական բնույթ են կրելու, և գյուղատնտեսության նախարարությունը մշտապես խթանելու է գյուղմթերքի վերամշակման ոլորտի զարգացումը, ինչպես նաև աջակցելու է տեղական արտադրողներին:
«Մենք պատրաստ ենք համագործակցել ցանկացած ընկերության հետ, որը հանդես կգա նմանատիպ նախաձեռնությամբ»,- ասաց Մակարյանը և հավելեց, որ նախատեսվում է սարքավորումների շրջանակն ընդլայնել:
Բաժանորդագրվեք մեր ալիքին Telegram-ում