ԵՐԵՎԱՆ, 24 ՀՈՒԼԻՍԻ, ԱՐՄԵՆՊՐԵՍ: Համաձայն ՀՀ զինված ուժերի պատրաստության պլանի, հուլիսի 18-22-ը 5-րդ բանակային զորամիավորումում անցկացվել են ենթակա զորամասերի գումարտակների հրամանատարների ու տեղակալների հավաքներ:

Ինչպես «Արմենպրես»-ին տեղեկացրին ՀՀ պաշտպանության նախարարության տեղեկատվության և հասարակայնության հետ կապերի վարչությունից, ուսումնական պարապմունքների ընթացքում լուրջ ուշադրություն է դարձվել բոլոր օղակների հրամանատարների դերակատարության, ինքնակրթության, ինչպես նաև մասնագիտական որակների բարձրացման հարցերին:

Իսկ դասախոսությունների հիմնական շեշտադրումը վերաբերել է մարտական գործողությունների վերլուծության ու գնահատման հարցերին, պաշտպանության առավել հուսալի և արդյունավետ կազմակերպման նպատակով մարտական հենակետերում ներդրված նորարարական մոտեցումներին: Ձեռք բերված գիտելիքներն ու հմտություններն ամրապնդվել են գործնական պարապմունքների ընթացքում: 

Ամփոփելով հրամանատարական հավաքների արդյունքները` զորամիավորման հրամանատար, գեներալ-մայոր Կարեն Աբրահամյանը կարևորել է նման միջոցառումների անցկացումը` շեշտելով պատրաստված հրամանատարի դերը զինված ուժերի զարգացման, առաջադրանքների կատարման ու մարտի վարման գործում: