ԵՐԵՎԱՆ, 22 ՀՈՒԼԻՍԻ, ԱՐՄԵՆՊՐԵՍ: Եվրասիական տնտեսական միությունից Հայաստանի դուրս գալու համար քաղաքական և տնտեսական հիմքեր չկան: Ինչպես հաղորդում է «Արմենպրես»-ը, հուլիսի 22-ին լրագրողների հետ հանդիպման ժամանակ նման կարծիք հայտնեց ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը՝ անդրադառնալով ԱԺ պատգամավոր Էդմոն Մարուքյանի այն հայտարարությանը, թե Հայաստանը պետք է դուրս գա ԵԱՏՄ-ից:

«Նման կարծիք Հայաստանում կա, սակայն այն եզակի է հանդիպում, և դրա ձևավորման համար քաղաքական և տնտեսական հիմքեր չկան»:

Աշոտյանը հիշեցրեց, որ Հայաստանի շրջակա տարածաշրջաններից Մերձավոր Արևելքում ընդհանրապես տնտեսական միության ծրագիր չկա, իսկ ԵՄ-ի պարագայում նույնիսկ ասոցացման համաձայնագիր ստորագրած երկրներն անդամակցության հեռանկարներ չունեն: Միաժամանակ, ըստ պատգամավորի, չնայած որ ԵԱՏՄ-ն տնտեսական կառույց է, ունի նաև աշխարհաքաղաքական բաղադրիչ, ինչը կարևոր է Հայաստանի համար:

Խոսելով Ռուսաստանի ազդեցության հետևանքով ՀՀ-ի և ԵՄ-ի միջև Համապարփակ և ընդլայնված համագործակցության համաձայնագրի ստորագրման կասեցման մասին՝ Աշոտյանը շեշտեց, որ այդ հարցադրումն արհեստական է ու մանիպուլյացիոն: «Նման հարց հայ-ռուսական հարաբերություններում գոյություն չունի»,- շեշտեց ԱԺ արտաքին հարաբերությունների մշտական հանձնաժողովի նախագահը: