Հայաստանում վերջին տասնամյակում մեկ աշխատողի հաշվով ավելացված արժեքը նկատելի աճ է գրանցել
ԵՐԵՎԱՆ, 19 ՀՈՒԼԻՍԻ, ԱՐՄԵՆՊՐԵՍ:Հայաստանում աշխատուժի արտադրողականությունն ունի աճի միտում, սակայն աճի տեմպը դեռևս զիջում է համաշխարհային միջին մակարդակին: «Արմենպրես»-ի հաղորդմամբ` այս մասին նշված է 2017 թվականի Հայաստանի ազգային մրցունակության զեկույցում:
«Մրցունակ մնալը ենթադրում է արտադրողականության աճ` մրցակիցներին գերազանցող տեմպերով: Հայաստանում վերջին տասնամյակում մեկ աշխատողի հաշվով համախառն ավելացված արժեքը (ՀԱԱ) նկատելի աճ է գրանցել: 2010-2015 թվականներին մեկ աշխատողի հաշվով ՀԱԱ-ն ավելացել է շուրջ 1,700 ԱՄՆ դոլարով (հաստատուն ԱՄՆ դոլար, 2010)` 3% միջին տարեկան աճի տեմպով: Մեկ շնչին բաժին ընկնող ՀԱԱ-ի միջին տարեկան աճի տեմպն էլ ավելի բարձր է` 5%»,- ասված է զեկույցում:
Ինչպես նշված է զեկույցում, 2015 թվականի տվյալներով` Հայաստանը մեկ զբաղվածին ընկնող ՀՆԱ-ով ( ըստ գնողունակության պարիտետի և հաստատուն գների) աշխարհում զբաղեցնում է 110-րդ տեղը:
«Աշխատուժի արտադրողականությունը Հայաստանում մեկ շնչի հաշվով ՀԱԱ-ի որոշիչ գործոնն է և ունի հետագա աճի անհրաժեշտություն` արտահանելի հատվածի միջոցով: 2005-2014 թթ. ընթացքում Հայաստանում մեկ շնչի հաշվով ՀԱԱ-ն ավելացել է ավելի քան կիսով չափով` հասնելով շուրջ 3,420 ԱՄՆ դոլարի: Կատարողականի վերլուծությունը ցույց է տալիս, որ աշխատուժի արտադրողականությունը (մեկ աշխատողի հաշվով ՀԱԱ) պայմանավորում է աճի երկու երրորդը: Զբաղվածության աճը պայմանավորում է աճի շուրջ մեկ քառորդը, իսկ տնտեսական ակտիվության մակարդակի բարձրացմամբ պայմանավորված է աճի միայն 8%-ը»,- նշված է զեկույցում:
Ըստ զեկույցի` արտադրողականության հետագա աճը պետք է ընթանա գլխավորապես արտահանելի հատվածի միջոցով:
«Արտադրողականության այս աճը դրական ազդեցություն կունենա հարակից ծառայությունների հատվածի վրա` աստիճանաբար տարածվելով նաև ոչ արտահանելի հատվածում: Աշխատաշուկայում մրցակցությունը կդառնա ուղղորդող մեխանիզմ` գործելով արտահանելի հատվածում`աշխատավարձերի աճի միջոցով:
Մյուս կողմից` տնտեսության վերափոխման մասշտաբն ու արդյունքները մեծապես պայմանավորված կլինեն ավանդական ոլորտների, մասնավորապես` գյուղատնտեսութ յան զարգացմամբ: Ակնկալվում է, որ այս ոլորտներում արտադրողականության աճը կհանգեցնի որոշակի աշխատատեղերի զուտ կորստի (կգերազանցի ընդլայնված արտադրության շնորհիվ ստեղծված աշխատատեղերի թիվը): Տնտեսության արտահանելի ոլորտներում ստեղծված հնարավորությունները պետք է կարողանան կլանել ավանդական ոլորտների և գյուղատնտեսական հատվածի ավելցուկ աշխատուժը` առաջացնելով կառուցվածքային փոփոխութ յունների և հմտությունների զարգացման անհրաժեշտութ յուն»,- ասված է Հայաստանի ազգային մրցունակության զեկույցում:
Բաժանորդագրվեք մեր ալիքին Telegram-ում