Սպասվող լրահոս. 19.07.2017
Զբոսաշրջության պետական կոմիտեն ամփոփում է կիսամյակային աշխատանքը: Այսօր` հուլիսի 19-ին, Զբոսաշրջության պետական կոմիտեի նախագահ Զարմինե Զեյթունցյանը, ՀՀ Զբոսաշրջության պետական կոմիտեի նախագահի առաջին տեղակալ Մեխակ Ապրեսյանը և Հայաստանի զբոսաշրջության զարգացման հիմնադրամի գործադիր տնօրենի պաշտոնակատար Արա Խզմալյանը լրագրողների հետ հանդիպմանը կներկայացնեն Զբոսաշրջության զարգացման 2017 թվականի ծրագիրը և կատարված աշխատանքները։
«Թի-Էս-Դի» ընկերությունը ներկայացնում է նոր արտադրանք՝ «EcoPad»: Այն բազմակի օգտագործման հնարավորությամբ հայկական առաջին նոթատետրն է: EcoPad-ի շնորհանդեսին ներկա կլինեն Տնտեսական զարգացման և ներդրումների նախարարի տեղակալ Էմիլ Տարասյանը, Տրանսպորտի, կապի և տեղեկատվական տեխնոլոգիաների նախարարի տեղակալ Արման Խաչատրյանը, Գյուղատնտեսության նախարարի տեղակալ Արմեն Հարությունյանը, ԱԳ նախարարի տեղակալ Ռոբերտ Հարությունյանը և այլք:
Երևանում կանցկացվի «Ջանքերի համախմբում՝ ռազմավարական նպատակների, ռեգիոնալ և տեղական դերակատարների ակտիվացման համար» խորագրով համաժողով: Կներկայացվի ԵՄ պիլոտային տարածքային զարգացման դրամաշնորհային ծրագրի մոդելի վրա հիմնված տարածքային զարգացման մոտեցումները, 7 դրամաշնորհ ստացած ծրագրերը: Ներկա կլինի ՀՀ վարչապետ Կարեն Կարապետյանը, ՏԿԶ նախարար Դավիթ Լոքյանը, ՀՀ-ում ԵՄ պատվիրակության ղեկավար, դեսպան Պյոտր Սվիտալսկին:
Խոսքի ազատության պաշտպանության կոմիտեն կներկայացնի 2017թ. երկրորդ եռամսյակի զեկույցը՝ Հայաստանում խոսքի ազատության վիճակի, լրագրողների և ԶԼՄ-ների իրավունքների պաշտպանության մասին: Փաստաթուղթը ներառում է վերջին ընտրությունների ընթացքը եւ հետընտրական ժամանակահատվածը: Զեկույցը կներկայացնի կոմիտեի նախագահ Աշոտ Մելիքյանը:
Երևանում կցուցադրվի «Երազողները» ֆիլմը, որին կհաջորդի քննարկում: Հուլիսի 9-ին համացանցում տարածվեց ֆիլմը, որը գրեթե 50 տարի կորած էր համարվում: «Երազողներ» ռոք-խմբի մասին պատմող ֆիլմը նկարահանվել է Հայկական հեռուստատեսության «Երեւան» կինոմիավորման կողմից 1969 թվականին: Ցուցադրությանը ներկա կլինեն Սերգեյ Փարաջանովի թանգարանի տնօրեն, «Երազողներ» ռոք-խմբի անդամ Զավեն Սարգսյանը, կոմպոզիտոր, դիրիժոր, «Երազողներ» ռոք-խմբի անդամ Երվանդ Երզնկյանը:
Հովհաննես Շարամբեյանի անվան ժողովրդական արվեստի կենտրոնում էլ հանրությանը կներկայացվեն ՀՀ ֆինանսների նախարարության աշխատակազմի «Թանկարժեք մետաղների և թանկարժեք քարերի պետական գանձարան» գործակալության պահոցներում գտնվող, թանկարժեք մետաղներից պատրաստված և բարձր գեղարվեստական արժեք ունեցող իրեր: Այցելուն հնարավորություն կունենա ծանոթանալու Պետական գանձարանի 51 նմուշի:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում:
Բաժանորդագրվեք մեր ալիքին Telegram-ում