Սպասվող լրահոս. 17.07.2017
ԵՐԵՎԱՆ, 17 ՀՈՒԼԻՍԻ, ԱՐՄԵՆՊՐԵՍ: «Արմենպրես» պետական լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Այսօր` հուլիսի 17-ին, ՀՀ սփյուռքի նախարարությունում տեղի կունենա երիտասարդների հայրենաճանաչության «Արի տուն» 2017թ. ծրագրի 5-րդ փուլի բացման հանդիսավոր արարողությունը: Բացման խոսքով հանդես կգա նախարար Հրանուշ Հակոբյանը: Ծրագրի 5-րդ փուլին մասնակցում է 190 սփյուռքահայ պատանի ու աղջիկ աշխարհի 17 երկրից:
ՀՀ ԿԳ նախարար Լևոն Մկրտչյանը կհանդիպի Հայաստանում սփյուռքահայ ուսուցիչների վերապատրաստման ծրագրի մասնակիցներին: Հանդիպումը տեղի կունենա Խ.Աբովյանի անվան հայկական պետական մանկավարժական համալսարանի բանասիրական ֆակուլտետի դահլիճում:
Լրագրողների հետ կհանդիպի ՀՀ բնապահպանության նախարարի առաջին տեղակալ Էրիկ Գրիգորյանը: Նա կներկայացնի ՀՀ կառավարության նոր ծրագրի շրջանակում բնապահպանական ոլորտում սպասվող բարեփոխումները:
Արցախում առաջին անգամ իրականացվել է հետազոտություն գործատուների հիմնախնդիրների հետ կապված: Աշխատանքի և սոցիալական հետազոտությունների ազգային ինստիտուտի տնօրեն Արման Սարգսյանը կներկայացնի հետազոտության արդեն ամփոփված արդյունքները:
Լրագրողների հետ կհանդիպեն նաև օրերս աշխատանքից ազատված ՍԱՊԾ «Գոգավան» սահմանային հսկիչ կետի արդեն նախկին պետ Նարեկ Մանթաշյանը և դատարանի առաջին ատյանում ՍԱՊԾ դեմ հայցը շահած՝ ծառայության նախկին փոխտնօրեն Գեորգի Ավետիսյանը: Նրանք կանդրադառնան ծառայությունում առկա խնդիրներին:
Ինչպիսի՞ն է Հայաստանի ներդրումային գրավչությունը, արտահանման ի՞նչ հնարավորություններ ունի մեր երկիրը: Այս հարցերի վերաբերյալ իրենց դիտարկումները կներկայացնեն փորձագետ Արտակ Մանուկյանը, բեռնափոխադրումների և զբոսաշրջության «ՍԱԹԻ» ընկերության տնօրեն Մակար Առաքելյանը, ՀՀ արտահանողների միության նախագահ Րաֆֆի Մխչյանը:
Հայաստանի ազգային ագրարային համալսարանում «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի նախաձեռնությամբ կանցկացվի «Խոսրով Կոտակից մինչև Կարո Ղաֆադարյան» թեմայով հանրապետական գիտաժողով: Այն նվիրված է հնագետ, վիմագրագետ, պատմաբան, թանգարանագետ Կարո Ղաֆադարյանի ծննդյան 110-ամյա հոբելյանին: Զեկուցումներով հանդես կգան ճանաչված գիտնականներ՝ Մուրադ Հասրաթյանը, Աշոտ Փիլիպոսյանը, Ֆրինա Բաբայանը և այլք:
Երևանի Կոմիտասի անվան պետական կոնսերվատորիայում Բագրատ Սրբազանի օրհնությամբ տեղի կունենա 2016-2017 ուս.տարվա գերազանցությամբ ավարտած բակալավր և մագիստրոս շրջանավարտների դիպլոմների հանդիսավոր հանձնման արարողությունը:
Մշակույթի նախարար Արմեն Ամիրյանն այսօր կլինի Լոռու մարզի Դսեղ գյուղում, որտեղ նա հետևելու է քանդակի սիմպոզիումի ընթացքին։ Սիմպոզիումը նախարարությունը կազմակերպել է Հովհաննես Թումանյանի 150-ամյա հոբելյանին ընդառաջ։ Մրցույթի մասնակիցների առաջադրանքն է՝ կերտել Թումանյանի ստեղծագործությունների հերոսների։ Ավարտուն քանդակները կտեղադրվեն Դսեղում՝ բանաստեղծի ծննդավայրում:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում:
Բաժանորդագրվեք մեր ալիքին Telegram-ում