Եգիպտոսի իշխանությունները փակել են Հուրգադայի այն լողափը, որտեղ հարձակում էր իրականացվել
ԵՐԵՎԱՆ, 15 ՀՈՒԼԻՍԻ, ԱՐՄԵՆՊՐԵՍ: Հուրգադայի քաղաքային իշխանությունները փակել են այն քաղաքային լողափը, որտեղ հուլիսի 14-ին դանակով մարդը հարձակում էր իրականացրել զբոսաշրջիկների վրա: Ինչպես հաղորդում է «Արմենպրես»-ը, այս մասին հայտնում է ՏԱՍՍ-ը:
Եգիպտոսի այդ շրջանի նահանգապետի կարգադրությամբ ամենակարճ ժամանակահատվածում լողափի մուտքերի մոտ տեղադրվելու են համապատասխան սարքավորումներ, որոնք ապահովելու են դրա անվտանգությունը և թույլ չեն տալու օտար անձանց մուտք գործել լողափ:
Հուրգադա քաղաքի հյուրանոցներից մեկում հուլիսի 14-ին անհայտ անձի կողմից սառը զենքով հարձակվելու հետևանքով զոհվել է Գերմանիայի երկու քաղաքացի: Չորս մարդ՝ երկու հայ, մեկ ռուս և մեկ չեխ, ստացել է մարմնական վնասվածք:
«Արմենպրես»-ի հետ զրույցում ՀՀ ԱԳՆ խոսնակ Տիգրան Բալայանը հայտնել էր, որ տուժած ՀՀ քաղաքացիները կանայք են: «Երկու քաղաքացիներն էլ կանայք են: Նրանցից մեկը դեռևս վերակենդանացման բաժանմունքում է, իսկ մյուսին երևի վաղը դուրս կգրեն»,- ասել էր Բալայանը և հավելել, որ տեղեկություն չունի, թե երբ են վերադառնալու հայրենիք:
Ավելի ուշ հայտնի էր դարձել, որ Հուրգադայում վիրավորված ՀՀ քաղաքացիներին հատուկ չվերթով տեղափոխելու են Կահիրեի լավագույն հիվանդանոցը` առավել որակյալ բուժօգնություն ցուցաբերելու համար:
Բաժանորդագրվեք մեր ալիքին Telegram-ում