Սուրեն Քրմոյանն անդրադարձել է Human Rights Watch-ի վերջին հաղորդագրությանը
ԵՐԵՎԱՆ, 11 ՀՈՒԼԻՍԻ, ԱՐՄԵՆՊՐԵՍ: Միջազգային կառույցների կողմից բարձրացված բոլոր մտահոգությունները իրենց պատասխանը ստանալու են: «Արմենպրես»-ի հաղորդմամբ` անդրադառնալով Ավան և Նոր-Նորք վարչական շրջանների ընդհանուր իրավասության դատարանում ոստիկանների և ՊՊԾ գնդի գրավման գործով ամբաստանյալների միջև տեղի ունեցած միջադեպի առնչությամբ Human Rights Watch միջազգային իրավապաշտպան կազմակերպության հաղորդագրությանը, հուլիսի 11-ին լրագրողների հետ զրույցում նշեց ՀՀ արդարադատության նախարարի տեղակալ Սուրեն Քրմոյանը:
«Բազմաթիվ անգամ իրավապահ մարմինները նշել են, որ համապատասխան քրեական գործ է հարուցվել, քննություն է ընթանում: Չմոռանանք նաև անմեղության կանխավարկածի մասին, որովհետև մենք չենք կարող ասել, որ տվյալ անձը արդեն մեղավոր է և նա չպետք է կատարի իր ծառայողական պարտականությունները»,- ասաց Քրմոյանը:
Քրմոյանը ներկայացրեց ՀՀ արդարադատության նախարարության մոտեցումն այս դեպքի առիթով:
«Արդարադատության նախարարությունը միանշանակ կողմ է, որ հանցագործության բոլոր դեպքերը , որոնք կատարվել են թե սովորական քաղաքացիների, և թե իրավապահ մարմինների ներկայացուցիչների կողմից, լիարժեք քննվեն ու մեղավորները պատասխանատվության ենթարկվեն: Եթե անձը մեկ դեպքով պատասխանատվության չենթարկվի, դա կարող է շղթայական հետևանքներ ունենալ: Միջազգային կառույցների կողմից բարձրացված բոլոր մտահոգությունները իրենց պատասխանը ստանալու են»,-ընդգծեց Քրմոյանը:
Քրմոյանը նաև անդրադարձավ դատական համակարգում ծանրաբեռնվածության խնդրին՝ շեշտելով, որ համակարգի ծանրաբեռնվածությունը նվազեցնելու համար դատավորների թիվը մեխանիկորեն չի ավելացվելու:
Բաժանորդագրվեք մեր ալիքին Telegram-ում