Շարմազանովն անհեթեթություն է համարում Մամեդյարովի վերջին հայտարարությունները
ԵՐԵՎԱՆ, 10 ՀՈՒԼԻՍԻ, ԱՐՄԵՆՊՐԵՍ: Ադրբեջանի արտաքին գործերի նախարար Էլմար Մամեդյարովի հայտարարությունն այն մասին, թե Ղարաբաղյան հակամարտությունը պետք է կարգավորվի տարածքային սկզբունքի հիման վրա, դիվանագիտական նոնսենս է: «Արմենպրես»-ի հետ զրուցում նման կարծիք հայտնեց ՀՀ ԱԺ փոխնախագահ, ՀՀԿ խոսնակ Էդուարդ Շարմազանովը:
«ԵԱՀԿ Մինսկի խմբի համանախագահ երկրների նախագահներն առնվազն 5 հրապարակային հայտարարություն են արել, նշելով, որ խնդիրը պետք է լուծվի երեք հիմնարար սկզբունքների հիման վրա` խաղաղ կարգավորում, ինքնորոշման իրավունք և տարածքային ամբողջականություն: Ավելին, վերջերս Եվրախորհրդարանը ևս մեկ անգամ վերահաստատեց ինքնորոշման իրավունքի առկայության անհրաժեշտությունը: Բացի այդ,Արցախի Հանրապետությունը ոչ մի վայրկյան անկախ Ադրբեջանի կազմում չի եղել, հետևաբար, Ադրբեջանի տարածքային ամբողջականություն եզրույթն Արցախի նկատմամբ օգտագործելը դիվանագիտական նոնսենս է»,- ընդգծեց Շարմազանովը:
ՀՀԿ խոսնակը զավեշտալի որակեց Մամեդյարովի հնչեցրած այն հայտարարությանը, թե իբր Ադրբեջանն ունի հազարամյա դիվանագիտական պատմություն:
«Ադրբեջան» անունով պետական միավորում աշխարհի երեսին առաջացել է 1918 թվականի մայիսի 27-ին: Մամեդյարովը, որքան էլ մեծ ցանկություն ունենա դրանից մի օր առաջ Ադրբեջան անունով պետություն գտնել, նրա ջանքերն ապարդյուն կլինեն:
Եթե Ադրբեջանի համար 99 տարին հազարամյակների պատմություն է, ուրեմն իրենց մոտ մաթեմատիկական հաշվարկները բոլորովին այլ ձևով են իրականացվում»,- նշեց Շարմազանովը:
Նրա խոսքով` Մամեդյարովը, խոսքում հղում անելով «Ադրբեջանի հազարամյա դիվանագիտական պատմության»-ը, հիշատակում է Աղվանք միջնադարյան պետությունը:
«Կարծում եմ՝ այստեղ Մամեդյարովը աններելի սխալ է անում, որովհետև ոչ ավել, ոչ պակաս ձեռնոց է նետում Իլհամ Ալիևի հայրիկին` Հեյդար Ալիևին, ով, անդրադառնալով Թուրքիայի և Ադրբեջանի թեմային, մշտապես նշել է «մեկ ազգ` երկու պետություն» կարգախոսը: Այսինքն` Հեյդար Ալիևը մշտապես խոսել է, որ ադրբեջանցիները և թուրքերը մեկ ազգ են, իսկ թուրքերը տարածաշրջան ներթափանցել են 11-րդ դարի 40-ական թվականներից ոչ շուտ»,- ասաց Շարմազանովը և հավելեց, որ չի զարմանա, եթե մյուս անգամ Մամեդյարովը հայտարարի, թե իբր Հռոմի կայսրությունը նույնպես ադրբեջանական է:
ՀՀ ԱԺ փոխնախագահը նաև անհեթեթություն է համարում Մամեդյարովի այն հայտարարությունը, թե Արցախը Ադրբեջանի «պատմական» տարածքն է:
«Ադրբեջանն ընդամենը 99 տարվա պատմություն ունի, իսկ Արցախը պատմական հայկական հող է, որի մասին դեռևս նշել են անտիկ Հունաստանի պատմաբանները: Թող բացեն նրանց աշխատությունները, որտեղ հստակ նշված է, որ մինչև Քուր և Արաքս գետերի հատման կետը Հայաստանի տարածքն է»,- եզրափակեց Շարմազանովը:
Հուլիսի 9-ին Ադրբեջանի արտաքին գործերի նախարար Էլմար Մամեդյարովը ադրբեջանական դիվանագետների հետ հանդիպման ժամանակ նշել է, թե իբր Արցախն Ադրբեջանի պատմական տարածքն է, Ադրբեջանը հազարամյակների պատմություն ունի , ինչպես նաև Ղարաբաղյան հակամարտությունը պետք է կարգավորվի տարածքային ամբողջականության սկզբունքի հիման վրա:
Բաժանորդագրվեք մեր ալիքին Telegram-ում