Լիբանանում համախմբվելու են սփյուռքահայեր՝ քննարկելու Սփյուռքում հայերի առջեւ ծառացած խնդիրները
ԵՐԵՎԱՆ, 8 ՀՈՒԼԻՍԻ, ԱՐՄԵՆՊՐԵՍ: Հայաստանից Լիբանան կմեկնի 5 մտավորական՝ մասնակցելու հուլիսի 11-ին Մեծի Տանն Կիլիկիո Արամ Ա կաթողիկոսի նախաձեռնությամբ անցկացվելիք հավաքին, որի նպատակն է համախմբել տարբեր տարիքի եւ մասնագիտությունների սփյուռքահայերի՝ համատեղ խորհրդակցելու եւ քննարկելու Սփյուռքում հայերի առջեւ ծառացած խնդիրները շրջապատող տագնապների պայմաններում: «Արմենպրես»-ին այս մասին տեղեկացրին Մեծի Տանն Կիլիկիո կաթողիկոսարանի լրատվական ծառայությունից:
Վեհափառ Հայրապետը, այս կապակցությամբ մասնավորապես, ասել է.
«Հեռու պետք է մնալ հաճախ մակերեսային, մասնակի ու ժամանակավոր հարցերից ու պետք է միասնաբար մտածել մեր ազգն ու հայրենիքը առջեւ ծառացած լուրջ մարտահրավերների մասին: Սփյուռքում հայի ինքնությունը նահանջի մեջ է, եւ այն պաշտպանելու կոչված մեր կառույցները ներկայիս տագնապների պայմաններում սկսել են կորցնել իրենց ուժը: Այս կացության նկատմամբ չենք կարող անտարբեր լինել»:
Երկօրյա հավաքը տեղի կունենա Պիքֆայայի Ս. Աստվածածին վանքում: Առաջիկա հավաքին Վեհափառ Հայրապետը հանդես կգա ուղերձով, ինչպես նաեւ առաջարկներով: Բացման խոսքով հանդես կգան նաեւ ՀՀ սփյուռքի նախարար Հրանուշ Հակոբյանը եւ պատմաբան Երվանդ Փամբուկյանը:
Բաժանորդագրվեք մեր ալիքին Telegram-ում