«Արմենիա» մրցույթ-փառատոնն իրենց ելույթներով կզարդարեն հեղինակավոր երաժիշտներ
ԵՐԵՎԱՆ, 4 ՀՈՒԼԻՍԻ, ԱՐՄԵՆՊՐԵՍ: «Արմենիա» միջազգային մրցույթ- փառատոնում համերգներով հանդես կգան հայտնի երաժիշտներ Մաքսիմ Վենգերովը, Ֆյոդոր Ռուդինը, Նարեկ Հախնազարյանը, Նարե Արղամանյանը և այլք: Մրցույթին կմասնակցեն աշխարհի 14 երկրից ժամանած 48 դաշնակահար: Այն Հայաստանում կանցկացվի առաջին անգամ և կտևի հուլիսի 4-12-ը: Փառատոնի վերաբերյալ հուլիսի 4-ին լրագրողների հետ հանդիպմանը խոսեցին կազմակերպիչներն ու ժյուրիի անդամները:
«Փառատոնի շրջանակում համերգային ծրագրերով ելույթներ կունենան փայլուն երաժիշտներ: Այն իր շուրջ է հավաքել լավագույն երաժշտական կոլեկտիվների, և մեր նպատակը մեր երկիրը, մեր երաժիշտներին աշխարհին ներկայացնելն է»,-«Արմենպրես»-ի հաղորդմամբ` նշեց «Արմենիա» մրցույթ-փառատոնի գեղարվեստական ղեկավար Սերգեյ Սմբատյանը:
Մշակույթի աջակցության եվրոպական հիմնադրամի նախագահ Կոնստանտին Իշխանովի խոսքով`հաջորդ տարի Մալթայում դաշնակահարների մրցույթ է կազմակերպվելու, որին կկարողանան մասնակցել ոչ բոլոր ցանկացողները:
«Այդ մրցույթը մրցանակային ֆոնդով, հավանաբար, ամենամեծը կլինի աշխարհում: Տարբեր երկրների 11 երաժշտական մրցույթների հաղթողներից կընտրվեն հինգ լավագույն դաշնակահարներ: «Արմենիա» մրցույթ-փառատոնի հաղթողը նույնպես հնարավորություն կունենա իրեն դրսևորել այդտեղ»,-ասաց նա:
«Արմենիա» միջազգային մրցույթի ժյուրիի նախագահ Արմեն Բաբախանյանն ընդգծեց, որ «Արմենիա»-ին մասնակցում են դաշնակահարներ Ռուսաստանից, Վրաստանից, Ֆրանսիայից, Չինաստանից, Կորեայից, Լեհաստանից, այլ երկրներից:
«Մրցույթը կանցկացվի երկու փուլով: Ծրագիրն ազատ է, դաշնակահարները չունեն տարիքային սահմանափակում: Շեշտեմ, որ ազատ ծրագիրը հնարավորություն է տալիս հասկանալ, թե որքանով են մասնակիցները ինքնատիպ և բազմակողմանի»,-եզրափակեց Բաբախանյանը:
Մրցույթի ժյուրիի անդամ դաշնակահար Վլադիմիր Օվչիննիկովն ասաց, որ յուրաքանչյուր մրցույթ իր համար նախևառաջ տոն է: «Մեզ հետաքրքիր է հետևել կատարողական տարբեր դպրոցների ներկայացուցիչներին ու նոր բացահայտումներ անել: Հուսամ` հայ դաշնակահարները մեզ կզարմացնեն»,- եզրափակեց Օվչիննիկովը:
«Արմենիա» միջազգային առաջին մրցույթ-փառատոնն անցկացվում է Հայաստանի պետական երիտասարդական նվագախմբի, Մշակույթի աջակցության եվրոպական հիմնադրամի նախաձեռնությամբ և ՀՀ մշակույթի նախարարության աջակցությամբ:
Այն կկայանա ՀՀ առաջին տիկին Ռիտա Սարգսյանի բարձր հովանու ներքո:
Բաժանորդագրվեք մեր ալիքին Telegram-ում