ԵՐԵՎԱՆ, 29 ՀՈՒՆԻՍԻ, ԱՐՄԵՆՊՐԵՍ: ՀՀ սփյուռքի նախարար Հրանուշ Հակոբյանը հունիսի 29-ին ընդունել է Քաթարի «AJB» շինարարական ընկերության գլխավոր տնօրեն, լիբանանահայ գործարար Միքայել Վարդանյանին: 

Ինչպես «Արմենպրես»-ին տեղեկացրին ՀՀ սփյուռքի նախարարության մամուլի եւ հասարակայնության հետ կապերի վարչությունից, նախարարը կարևորել է հայ գործարարի ազնիվ դիրքորոշումը, նշել, որ Հայրենիքում տուն կառուցելը, ներդրում անելը, աշխատատեղեր ստեղծելը մեծ հայրենասիրություն է:

«Ուշ, թե շուտ Հայրենիք պիտի վերադառնաք: Հայաստանն է  հայերի տունը: Հայրենիքում պետք է տուն ունենաք, գործ ունենաք: Ազգովի պիտի մասնակցենք Հայաստանի հզորացմանը»,- նշել է նախարարը:

Միքայել Վարդանյանը շնորհակալություն է հայտնել ջերմ ընդունելության համար, ներկայացրել իր ծրագրերը: Նա մասնավորապես նշել է. «Կարծում եմ բոլոր հայերը այդ ցանկությունը ունեն՝ օգտակար լինել Հայրենիքին: Պիտի հզորացնենք Հայաստանը, ուրիշ ճանապարհ չունենք»:

Քննարկվել են հետագա համագործակցության և կազմակերպական այլ հարցեր: