Կոմունիկացիոն կազմակերպությունները հնարավորություն ունեն միեւնույն հարթակում տեսնել իրենց ենթակայության ենթակառուցվածքները
ԵՐԵՎԱՆ, 28 ՀՈՒՆԻՍԻ, ԱՐՄԵՆՊՐԵՍ: ՀՀ Կառավարությանն առընթեր անշարժ գույքի կադաստրի պետական կոմիտեի Գեոպորտալում արդեն իսկ հասանելի են Երեւան քաղաքի բազային երկրատեղեկատվական համակարգի շերտերը: «Արմենպրես»-ի հաղորդմամբ` լրագրողների հետ զրույցում Կոմիտեի նախագահի տեղակալ Նարեկ Գրիգորյանն ասաց, որ կոմունիկացիաները տնօրինող կազմակերպությունները հնարավորություն ունեն միեւնույն հարթակում տեսնել իրենց ենթակայության տակ գտնվող ենթակառուցվածքները: «Բազային երկրատեղեկատվական համակարգի առկայությունը կկրճատի շինարարական թույլտվությունների տրամադրման ժամկետները, կբարձրացնի տարբեր մակարդակներում որոշումների ընդունման արդյունավետությունը, կկրճատի ծախսերն ու կբացառի կրկնակի աշխատանքները»,-ասաց նա:
Գրիգորյանի խոսքով` համակարգը կարեւոր է նաեւ պոտենցիալ ներդրողների համար ` գրավչությունն ապահովելու հարցում: «Օրինակ երբ ներդրողը կարողանում է նախապես իմանալ, թե իրեն հետաքրքրող հողակտորում ինչպիսի կոմունիկացիաներ կան, կամ ինչ հեռավորության վրա են դրանք գտնվում, նա կարողանում է արդյունավետ որոշել, թե ինչ հեռավորության վրա պետք է տեղադրի գծային ենթակառուցվածքները»,-հավելեց նա:
Ներկայումս ՀՀ Էներգետիկայի եւ բնական պաշարների նախարարության ջրային տնտեսության պետական կոմիտեի, Երեւանի քաղաքապետարանի, «Ռոստելեկոմ», «Արմենթել», «Յուքոմ», «Վիվա-Սել ՄՏՍ», «Երեւան ջուր», «Հայաստանի էլեկտրական ցանցեր», «Բարձրավոլտ էլեկտրական ցանցեր», «Գազպրոմ Արմենիա» ընկերություններն արդեն ներառվել են գեոպորտալում:
Բազային երկրատեղեկատվական համակարգի ստեղծման եւ ներդրման նույնանման աշխատանքներ նախատեսվում է իրականացնել նաեւ Գյումրի քաղաքում:
Բաժանորդագրվեք մեր ալիքին Telegram-ում