ԵՐԵՎԱՆ, 28 ՀՈՒՆԻՍԻ, ԱՐՄԵՆՊՐԵՍ: Պաշտպանության նախարարության հաշվեկշռում գտնվող մեքենան, որ վթարվել էր օրեր առաջ, եղել է շահագործման ժամկետի մեջ: «Արմենպրես»-ի հաղորդմամբ` այս մասին հունիսի 28-ին լրագրողների հետ հանդիպման ժամանակ ասաց ՀՀ պաշտպանության նախարար Վիգեն Սարգսյանը: Նրա խոսքով` բանակի պարագայում վթարները երբեմն տեղի ունեցող երևույթներ են: Նախարարը նաև հայտնեց, որ ինքն անձամբ է այցելել և տեղեկացել, որ վթարից տուժածների բոլորի վիճակը բավարար է:

 «Մեքենայում եղել են 18 զինծառայող, իսկ այդ մեքենայի համար թույլատրելի քանակը 20-ն է, հետևաբար` ավելի մարդ չի եղել։ Մեքենան շահագործման ժամկետի մեջ էր։ Այս տարի ավտոպարկի թարմացումներ ենք իրականացրել: Արդյունքում այնքան մեքենաներ ենք ձեռք բերել , որ վերջին տասնամյակի ընթացքում ՊՆ-ն ձեռք չէր բերել: Մեքենաներով հագեցվում են հատկապես առաջնագծի զորամասերը»,- ասաց Սարգսյանը: Նախարարի հավաստմամբ` ավտոտեխնիկան առանց թույլտվության չի կարող վարել ոչ մեկը: