Մանչեսթերի ահաբեկչության հեղինակը ռումբ պատրաստելիս օգտվել է Youtube-ից
ԵՐԵՎԱՆ, 24 ՀՈՒՆԻՍԻ, ԱՐՄԵՆՊՐԵՍ: Մանչեսթերի ահաբեկչության հեղինակ Սալման Աբեդին ահաբեկչություն իրականացնելու համար «մահապարտի գոտի» պատրաստել է` օգտվելով Youtube վիդեոպորտալի տեսանյութերից: Ինչպես հաղորդում է «Արմենպրես»-ը, այս մասին հայտնում է «Ինտերֆաքս»-ը` հղում կատարելով The times-ին:
Նշվում է, որ տղամարդը ներբեռնել է ռումբ պատրաստելու մասին, ինչպես նաև ռումբի քիմիական պարունակության մասին պատմող տեսանյութեր ոչ միայն Youtube-ից, այլ նաև ինտերնետային այլ կայքերից:
Հատուկ ծառայությունները սկզբում ենթադրել են, որ ռումբը պատրաստել է այդ գործում մեծ փորձ ունեցող անձ, սակայն նշվում է, որ համապատասխան տեսանյութերը «Ֆեյսբուք» սոցիալական ցանցում և Youtube-ում հասանելի են եղել Մանչեսթերում իրականացված ահաբեկչությունից հետո ևս երկու օր:
Մանչեսթերի «Մանչեսթեր Արենա» մարզադաշտում պայթյունը տեղի է ունեցել մայիսի 22-ի երեկոյան, ամերիկացի երգչուհի Արիանա Գրանդեի համերգի ժամանակ: Ահաբեկչության հետևանքով զոհվել է 22 մարդ, այդ թվում` երեխաներ:
Բաժանորդագրվեք մեր ալիքին Telegram-ում