Հայաստանում առաջին անգամ կկայանա Ինժեներական համաժողով-ցուցահանդես
ԵՐԵՎԱՆ, 22 ՀՈՒՆԻՍԻ, ԱՐՄԵՆՊՐԵՍ: Հայաստանում առաջին անգամ Ինժեներական համաժողով-ցուցահանդես կկազմակերպվի, որտեղ կքննարկվեն ոլորտի գլոբալ զարգացումները, ինժեներական կրթության եւ գործարար միջավայրի մարտահրավերները, ոլորտի հիմնական դերակատարների հետ գաղափարների ու փորձի փոխանակման հնարավորություն կընձեռվի: «Արմենպրես»-ի հաղորդմամբ` լրագրողների հետ հանդիպմանը Ձեռնարկությունների ինկուբատոր հիմնադրամի տնօրեն Բագրատ Ենգիբարյանն ասաց, որ համաժողով-ցուցահանդեսը հնարավորություն կտա տեսնել աշխարհում վերջին մարտահրավերները: «Ֆորումի ընթացքում քննարկումները կծավալվեն երեք հիմնական ուղղություններով. ինժեներական արդյունաբերության վերջին զարգացումները, կրթական խնդիրները եւ առաջադեմ արդյունաբերական հավելվածները»,-ասաց նա:
Տրանսպորտի, կապի եւ տեղեկատվական տեխնոլոգիաների նախարարի տեղակալ Բորիս Դեմիրխանյանի խոսքով` ինժիներական զարգացումները կարող են Հայաստանը տանել ավելի պայծառ, ավելի լավ ճանապարհով: «Առաջին փորձը կլինի Վանաձորում, բայց համոզված եմ, որ դրանով սահմանափակում չի լինի: Ամենակարեւորը՝ ֆորումում անդրադարձ կկատարվի կրթական խնդիրներին: Կարեւորում եմ այն կոնցեպտը, որն առաջ կքաշվի ինժեներական ֆորումից հետո»,-ասաց նա:
Ինժեներական համաժողով-ցուցահանդեսը կկայանա հունիսի 24-ին Վանաձորի տեխնոլոգական կենտրոնում: Այն կազմակերպել են ձեռնարկություննների ինկուբատոր հիմնադրամը, ՀՀ կառավարությունը, Լոռու մարզպետարանը եւ «Աջակցություն ՓՄՁ զարգացմանը Հայաստանում» ծրագիրը: Տարածաշրջանային զարգացմանը, ինժեներական եւ բարձրտեխնոլոգիական ընկերությունների խթանմանը միտված համաժողով-ցուցահանդեսը կներգրավի շուրջ 150 մասնակցի:
Բաժանորդագրվեք մեր ալիքին Telegram-ում