ԵՐԵՎԱՆ, 20 ՀՈՒՆԻՍԻ, ԱՐՄԵՆՊՐԵՍ: Ուրուգվայի Մարդու իրավունքների ազգային ինստիտուտը (INDDHH) նամակ է հղել երկրի կանցլեր Ռոդոլֆո Նին Նովոային՝ մտահոգություն հայտնելով այն փաստի առնչությամբ, որ Ադրբեջանի ԱԳՆ-ն որոշել է իրավապաշտպան Օսկար Լոպեսին ներառել «սև ցուցակ»-ում այն բանի համար, որ վերջինս Արցախում սահմանադրական հանրաքվեին աշխատել է որպես դիտորդ: Ինչպես հաղորդում է «Արմենպրես»-ը, այս մասին հայտնում է Prensa Armenia-ն:

«Մարդու իրավունքների ազգային ինստիտուտը մտահոգություն է հայտնում՝ կապված այն ազդեցությունների հետ, որ Ադրբեջանի կառավարության այս բանաձևը կարող է ունենալ Օսկար Լոպեսի իրավունքների վրա, մասնավորապես խոսքի ազատության և տեղափոխման ազատության ոլորտում: Ինստիտուտը խնդրում է կանցլերին անհրաժեշտ քայլեր ձեռնարկել Ուրուգվայի վերոնշյալ քաղաքացու իրավունքների խախտումներն անհապաղ դադարեցնելու նպատակով»,- ասվում է Մարդու իրավունքների ազգային ինստիտուտի նամակում:

Ուրուգվայցի իրավապաշտպան Օսկար Լոպեսն ավելի վաղ դատապարտել էր Ադրբեջանին իրեն և մի խումբ այլ գործիչների «սև ցուցակ»-ում ներառելու համար: Նա հայտարարել էր, որ «Լեռնային Ղարաբաղը հայ բնակչություն ունեցող երկիր է, որն իր ժողովրդի որոշմամբ արդեն 25 տարի անկախ է: Այն ժողովրդական, հանրապետական երկիր է իրավունքների ինստիտուցիոնալացված շրջանակով, օմբուդսմենով և ժողովրդավարության մեխանիզմով, որն իսկապես աշխատում է»: