Թալիշում կառուցվելիք նոր բնակարանների ու դպրոցի նախագծերը պատրաստ են
ԵՐԵՎԱՆ, 19 ՀՈՒՆԻՍԻ, ԱՐՄԵՆՊՐԵՍ: Արցախի Հանրապետության քաղաքաշինության նախարարի մոտ խորհրդակցության օրվա թեման Թալիշում կատարվող աշխատանքներին էր վերաբերում:
Ինչպես «Արմենպրես»-ին տեղեկացրին Արցախի Հանրապետության քաղաքաշինության նախարարությունից, ապրիլյան առճակատման ընթացքում հրետակոծված ու գրեթե հիմնահատակ ավերված Թալիշում շուտով կտրվի բնակարանաշինության մեկնարկը: Քաղաքաշինության նախարարը Կապիտալ շինարարության վարչության անձնակազմի հետ քննարկել է հրետակոծված բնակարանների վերանորոգման-վերակառուցմանն ուղղված մի շարք հարցեր, տեխհսկիչներին տվել համապատասխան հանձնարարականներ` առաջիկայում վերանորոգման -վերակառուցման համար նախատեված առայժմ 16 բնակարանների գույքագրման, չափագրման և նախահաշվարկի ուղղությամբ:
Թալիշում առայժմ ընթացքի մեջ է համայնքապետարանի և հանդիսությունների սրահի շինարարությունը, պատրաստ է նոր կառուցվող բնակարանների և դպրոցի նախագիծը, իսկ մանկապարտեզում` ներկայումս կատարվում է հողային աշխատանքներ, որից հետո` կիրականացվի հիմքի կառուցումը:
Տեղամասում «Եվրոստրոյ» ՍՊԸ-ն է աշխատում:
Բաժանորդագրվեք մեր ալիքին Telegram-ում