ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ:  Պետական սեփականություն հանդիսացող գույքը վարձակալության հանձնելու դիմաց 2017 թվականի հունվար-ապրիլին ՀՀ պետական բյուջե է մուտքագրվել շուրջ 945.8 մլն դրամ՝ 99.1%-ով ապահովելով առաջին կիսամյակի ծրագիրը: Ինչպես տեղեկացնում է «Արմենպրես»-ը` վկայակոչելով ՀՀ ֆինանսների նախարարության բյուջեի ամսական հաշվետվության տվյալները, նշված եկամուտները նախորդ տարվա նույն ժամանակահատվածի ցուցանիշը գերազանցել են 9.6 անգամ, որը հիմնականում պայմանավորված է «Երևան Ջուր», «Հայջրմուղկոյուղի», «Լոռի-ջրմուղկոյուղի», «Շիրակ-ջրմուղկոյուղի» և «Նոր Ակունք» ՓԲԸ-ների կողմից օգտագործվող ու պահպանվող ջրային համակարգերի և այլ գույքի օգտագործման իրավունքը վարձակալությամբ «Վեոլիա Օ կոմպանի Ժեներալ Դեզ Օ» ընկերությանը փոխանցելու հանգամանքով: 2017 թվականի անցած ժամանակահատվածում վարձակալության պայմանագրի համաձայն «Վեոլիա Օ կոմպանի Ժեներալ Դեզ Օ» ընկերության կողմից ՀՀ պետական բյուջե է փոխանցվել 856.5 մլն դրամ: