Շիրակի մարզի համայքները միացան համապետական շաբաթօրյակին
17:57, 27 Մայիս 2017
ԳՅՈՒՄՐԻ, 27 ՄԱՅԻՍԻ, ԱՐՄԵՆՊՐԵՍ: Չնայած անձրևային եղանակին Շիրակի մարզի համայնքները, «Մաքուր Հայաստան» ծրագրի շրջանակներում, միացան համապետական շաբաթօրյակին: Մարզային իշխանությունը՝ Շիրակի մարզպետի գլխավորությամբ, շաբաթօրյակ իրականացրեց Գյումրու մուտքի մոտ՝ մաքրելով Ազատանի կամուրջի տակ գտնվող հատվածը: Մարզպետարանին միացել էր նաև «Գյումրի բժշկական կենտրոն»-ի աշխատակազմը: Նախ բահերով ու ձեռքով տարածքի կենցաղային աղբը լցվեց պարկերը, ապա տեղափոխվեց տեխնիկայի օգնությամբ: Որոշ տարածքներ հնարավոր էր մաքրել միայն տեխնիկայի միջոցով: Շաբաթօրյակի ժամանակ աշխատել է 92 ինքնաթափ, 20 բարձիչ մեխանիզմ, 4 էքսկավատոր:
Գյումրու ողջ տարածքում ևս իրականացվեց մաքրման, աղբի հեռացման աշխատանքներ: Գյումրու քաղաքապետարանի աշխատակազմը՝ գլխավորությամբ Գյումրու քաղաքապետ Սամվել Բալասանյանի, աշխատանքներ իրականացրեց Օզանյան փողոցի ողջ երկայնքով: Մարզի մյուս համայքները ևս միացել էին շաբաթօրյակի:
«Այս շաբաթօրյակը բոլորիս է պետք: Վերջապես մենք էլ պետք է հասկանաք, որ պետք է մաքուր բակում, քաղաքում ու մարզում ապրենք: Մեր երեխաներն ու մեր թոռներն այդ իրավունքը ձեռք են բերել: Բայց շաբաթօրյակը միայն մաքրելը չէ, այլ մաքրածը մաքուր պահելը»,-«Արմենպրես»-ին նշեց Շիրակի մարզպետ Հովսեփ Սիմոնյանը:
Շիրակի մարզպետ Հովսեփ Սիմոնյանը և Գյումրու քաղաքապետ Սամվել Բալասանյանն ավելի ուշ ծառ տնկեցին Գյումրու թիվ 23 դպրոցի բակում:
Արմենուհի Մխոյան
Բաժանորդագրվեք մեր ալիքին Telegram-ում