Գյումրու «Երեխաների տուն» մանկատունը տնտեսում կունենա վերականգնվող էներգիայի շնորհիվ
17:49, 13 Մայիս 2017
ԳՅՈՒՄՐԻ, 13 ՄԱՅԻՍԻ, ԱՐՄԵՆՊՐԵՍ: Գյումրու «Երեխաների տուն» մանկատունն այսուհետ տնտեսում կունենա վերականգնվող էներգիայի շնորհիվ:
Մայիսի 13-ին Գյումրու «Երեխաների տուն» ՊՈԱԿ-ում ազդարարվեց «Վերականգնվող էներգիան՝ որպես տեխնոլոգիական զարգացման գործիք» ծրագրի մեկնարկը: Նախաձեռնության շնորհիվ Երեխաների տանը ներդրվել են մինչև 25 տարվա կենսագործունեության ժամկետ ունեցող «Արփի Սոլար» արևային ջրատաքացման ու ֆոտովոլտային համակարգեր, որոնք կապահովեն անվճար տաք ջրով և էլեկտրաէներգիայով` տարեկան խնայելով ավելի քան 4 միլիոն դրամ։ Ծրագիրն իրականացվում է Ինֆորմացիոն տեխնոլոգիաների ձեռնարկությունների միության կողմից` «Ֆիլիպ Մորիս» ընկերության ֆինանսավորմամբ և «Կայուն էներգիայի զարգացման հիմնադրամ»-ի ու «Արփի Սոլար» արևային էներգիայի համակարգերի ընկերության հետ համագործակցությամբ։ Այն կշարունակվի Գյումրիում ևս 5 սոցիալական-կրթական ու մշակութային հաստատություններում արևային համակարգերի ներդրմամբ:
Ինչպես տեղեկացնում է «Արմենպրես»-ը, սրանով Շիրակի մարզն առաջինն է միանում արևային շարժմանը՝ «Վերականգնվող էներգիան՝ որպես տեխնիկական կրթության զարգացման գործիք» ծրագրի միջոցով։ Սակայն «Արփի Սոլար»-ը շարունակելու է մեկնարկած արևային շարժմանը ներգրավել Հայաստանի մյուս մարզերը ևս՝ ինտենսիվ օգտագործելով երկրի հսկայական արևային պոտենցիալը և զարկ տալով անկախ էներգակայուն համակարգի ձևավորմանն ու զարգացմանը. վստահեցնում են «Արփի Սոլար»-ի պատասխանատուները։ Ծրագիրը նպատակ ունի արևային էներգիայի միջոցով կրճատելու հաստատության էներգետիկ ծախսերն ու խնայած գումարը ներդնելու կրթական ու զարգացման ծրագրերի մեջ:
««Վերականգնվող էներգիան՝ որպես տեխնոլոգիական զարգացման գործիք» ծրագրի և Արևային համակարգերի շնորհիվ մանկատունը կապահովվի անվճար տաք ջրով ու էլեկտրաէներգիայով՝ 6000լ/օր ծավալով արևային ջրատաքացման անջատ-հորիզոնական համակարգերի և 25,44 կՎտ ընդհանուր հզորությամբ արևային ֆոտովոլտային ներցանցային համակարգերի միջոցով։ Մինչև 25 տարվա կենսագործունեության ժամկետ ունեցող արևային համակարգերը տարեկան կխնայեն ավելի քան 4 միլիոն դրամ»,- ծրագրի մեկնարկի ժամանակ նշեց «Կայուն էներգիայի զարգացման հիմնադրամ»-ի տնօրեն Հասմիկ Բարսեղյանը:
Ինչպես տեղեկացրեց Գյումրու «Երեխաների տուն» ՊՈԱԿ-ի տնօրեն Աննա Գևորգյանը՝ հաստատությունը տնտեսած գումարը կներդնի կրթական ու վերականգնողական ծրագրերի մեջ։ Ի դեպ, մանկատունը հատուկ կարիքներ ունեցող երեխաների համար նախատեսված մասնագիտացված մանկատուն է, որը զբաղվում է առանց ծնողական խնամքի մնացած, ծանր սահմանափակ կարողություններ ունեցող մինչև ութ տարեկան երեխաների շուրջօրյա լրիվ խնամքով։ Այժմ մանկատան խնամքի տակ է գտնվում 0-8 տարեկան առանց ծնողական խնամքի 125 երեխա՝ տարբեր մարզերից։ Այստեղ իրականացվում են սահմանափակ կարողություններով երեխաների հետ դաստիարակչական, կրթական, սոցիալ-հոգեբանական և շտկողական աշխատանքներ, վերականգնողական բուժում և այլն: «Այս ծրագրի շնորհիվ կունենանք տաք ջրամատակարարում ու էներգիա, ինչը բավական ծախսատար էր, իսկ հիմա արդեն տնտեսում կունենանք, որը կուղղենք այլ նպատակի»,-նշեց Աննա Գևորգյանը՝ շնորհակալություն հայտնելով այն բոլոր կազմակերպություններին, որոնց շնորհիվ ծրագիրը կյանքի է կոչվել:
Արմենուհի Մխոյան
Բաժանորդագրվեք մեր ալիքին Telegram-ում