Երևանում տեղի ունեցավ հայերեն կրկնօրինակմամբ «Խոստումը» ֆիլմի փակ ցուցադրությունը
ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Հայոց ցեղասպանությանն անդրադարձող հոլիվուդյան «Խոստումը» ֆիլմի փակ ցուցադրությունը տեղի ունեցավ ապրիլի 24-ին «Մոսկվա» կինոթատրոնում: Ֆիլմը ներկայացվեց հայերեն կրկնօրինակմամբ:
«Այս կինոնկարի միջոցով ևս մեկ անգամ բարձրաձայնում ենք մեր խնդիրը: Կարծում եմ` կարևոր է, որ դրա մասին աշխարհին պատմում ենք ոչ թե հայերս, այլ հանրահայտ հոլիվուդյան դերասանները»,- «Արմենպրես»-ի հաղորդմամբ ` նշեց «Շարմ Հոլդինգ»-ի պրոդյուսեր Կարեն Ղազարյանը և հավելեց, որ ֆիլմը բարձր մակարդակով է նկարահանված, և այն կարող են դիտել տարբեր ազգերի, դավանանքի մարդիկ, քանի որ կինոնկարում կա սեր, գեղեցիկ մարդկային հարաբերություններ:
Ղազարյանի խոսքով` «Շարմ Հոլդինգ»-ը Հայաստանում ֆիլմի ցուցադրման իրավունքը բավականին ուշ է ձեռք բերել և կարճ ժամանակում են իրականացվել հնչյունավորման և այլ աշխատանքները: Նա հույս հայտնեց, որ դեռ հնարավորություն կստեղծվի ֆիլմի դերասանական կազմին ու ռեժիսորին հյուրընկալել Հայաստանում:
Կինոժապավենում ձայնագրվել են «Հովեր» կամերային երգչախումբը և Ազգային օպերային թատրոնի մեներգիչ Լիպարիտ Ավետիսյանը:
«Մեզ առաջարկեցին Կոմիտասի պատարագից մի հատված կատարել, և մենք սիրով համաձայնվեցինք: Հարուստ տեսարաններով ֆիլմ է, որն աննախադեպ է ու հաջողված»,- ասաց «Հովեր» երգչախմբի գեղարվեստական ղեկավար Սոնա Հովհաննիսյանը:
Լիպարիտ Ավետիսյանն ընդգծեց, որ ոգևորությամբ է համագործակցել «Հովեր» երգչախմբի հետ, որն իր սիրելի կոլեկտիվն է: «Հպարտ եմ, որ մեր ներդրումն ունեցանք այս ահռելի աշխատանքում»,- ասաց նա:
«Շարմ Հոլդինգ»-ի նախաձեռնությամբ` Հայաստանի հանրային հեռուստաընկերության դերասանական և թարգմանչական բազայի հիման վրա կատարվել է ֆիլմի հայերեն կրկնօրինակումը, որին մասնակցել են Խորեն Լևոնյանը, Բաբկեն Չոբանյանը, Սիրանուշ Լազյանը և այլք:
Անժելա Սաֆարյանի կերտած կերպարին` Մարալին, հնչյունավորած դերասանուհի Սիրանուշ Լազյանն ասաց, որ հպարտ է արմատներով հայ դերասանուհու հնչյունավորելու համար և ցանկանում է, որ իր կերպարին դիտելով կրկին գնահատենք հայ կնոջը` համբերատար, սիրով լի:
Հայաստանյան կինովարձույթում ֆիլմը կհայտնվի ապրիլի 27-ից:
«Խոստումը» ֆիլմի սյուժեն պատմում է առաջին համաշխարհային պատերազմի օրերին Օսմանյան կայսրությունում հայերի տեղահանման ու կոտորածի` Հայոց ցեղասպանության մասին: Այն մի երիտասարդ հայ բժշկի մասին է, որը տեղափոխվումն է Կոստանդնուպոլիս սովորելու: Այնտեղ ծանոթանում է նկարչուհի Աննայի հետ ու սիրահարվում:
Լեգենդար Քըրք Քըրքորյանի «Survival Pictures» ընկերության կողմից ստեղծված «Խոստումը» ֆիլմը բեմադրել է «Հոթել Ռուանդա» ֆիլմի պրոդյուսեր և օսկարակիր ռեժիսոր Թերրի Ջորջը՝ դերասանական կազմը համալրելով համաշխարհային աստղերով`Օսկար Այզեք, Քրիստիան Բեյլ, Շարլոտ լը Բոն, Անժելա Սաֆարյան և այլք: Երաժիշտ ու ակտիվիստ Սերժ Թանկյանը հանդիսացել է ֆիլմի երաժշտական մասի խորհրդատուն ու նպաստել ֆիլմի սաունդթրեքի համար հայկական ժողովրդական երգ «Սարի սիրուն յար»-ի ժամանակակից ներկայացմանը:
Բաժանորդագրվեք մեր ալիքին Telegram-ում