Ժամանակը Երևանում՝ 11:07:36,   14 Նոյեմբեր

Նարեկացու «Մատյան ողբերգության»-ն արդեն հասանելի է նաև լատիշերեն. Ռիգայում կայացել է շնորհանդեսը


ՌԻԳԱ, 5 ԱՊՐԻԼԻ, ԱՐՄԵՆՊՐԵՍ: Լատվիայի մայրաքաղաք Ռիգայում տեղի է ունեցել միջնադարյան հայ հոգևորական, բանաստեղծ, փիլիսոփա, տաղերգու Գրիգոր Նարեկացու «Մատյան ողբերգության» գրքի լատիշերեն տարբերակի շնորհանդեսը: Գիրքը թարգմանել է լատվիացի հայագետ Վալդա Սալմինան: Ինչպես հաղորդում է «Արմենպրես»-ը, Լատվիայի համալսարանում ապրիլի 4-ին տեղի ունեցած շնորհանդեսին ներկա են եղել ՀՀ մշակույթի նախարարի տեղակալ Ներսես Տեր-Վարդանյանը, Լատվիայում Հայաստանի Հանրապետության դեսպան Տիգրան Մկրտչյանը, «Արմենպրես» լրատվական գործակալության տնօրեն Արամ Անանյանը, թարգմանիչ Վալդա Սալմինան, Մատենադարանի հետազոտող Արուսյակ Թամրազյանը, լատվիացի հասարակական գործիչներ:

«Գրիգոր Նարեկացին հավատում էր, որ «Մատյան ողբերգության»-ը լինելու է համամարդկային ստեղծագործություն, գիրքն ունենալու է ընդհանրական լսարան և հույս ուներ, որ այն թարգմանվելու և ընդունվելու է տարբեր ժողովուրդների կողմից տարբեր դարաշրջաններում»,- «Արմենպրես»-ի հաղորդմամբ՝ ողջույնի իր խոսքում ընդգծել է ՀՀ մշակույթի նախարարի տեղակալ Ներսես Տեր-Վարդանյանը:

Նա Բալթյան երկրներում հայկական մշակութային արժեքների տարածման գործում ունեցած ավանդի համար նախարարության «Գրիգոր Նարեկացի» հուշամեդալով պարգևատրեց թարգմանիչ, հայագետ Վալդա Սալմինային, Բալթյան երկրներում հայ եկեղեցու հոգևոր հովիվ Տեր Խոսրով քահանա Ստեփանյանը, Լատվիայի պետական կոնսերվատորիայի պրոֆեսոր Րաֆֆի Խարաջանյանը, պատվոգրերով պարգևատրվեցին գործարարներ Մխիթար Մխիթարյանը և Հովիկ Մկրտչյանը:

«10-րդ դարի հոգևորական և բանաստեղծ Գրիգոր Նարեկացու «Մատյան ողբերգությանը» Աստվածաշնչի հետ մեկտեղ այն երկու գրքերն են, որոնք պահվում են բոլոր հայ ընտանիքներում: «Նարեկը», ինչպես գիրքն անվանում են հայերը, ոչ միայն կարդացել ու համբուրել են, պահել գրապահարաններում ու բարձերի տակ, այլև զգացել, գնահատել ու պաշտել: Այն հայկական ամենամեծ բանաստեղծական գործն է, որում Աստծո հետ երկխոսության միջոցով մարդն աստվածանում է, իսկ Աստված մարդանում: Այնուամենայնիվ, անհատը, մտածող, տրամաբանող, զգացող, տառապող անհատն իր բարդ մտքերով, կասկածներով, հույսերով, երազանքներով ու իդեալներով մնում է այս աշխատանքի հիմնական հերոսը: «Նարեկ»-ը կարծես մի աղբյուր լինի այնքանով, որքանով ընթերցողը կարող է հասնել նրան, հասկանալ իմաստն ու ուղերձը, նա այնքան բացվում է: Լատվիացի հայագետ Վալդա Սալմինայի ջանքերով լատվիացի ընթերցողները հնարավորություն ունեն այն կարդալու, շփվելու իրական գրական գլուխգործոցի հետ: Այն հայ և համաշխարհային գրականության գանձերից է»,- նշում է Լատվիայում ՀՀ արտակարգ և լիազոր դեսպան Տիգրան Մկրտչյանը:

Լատվիայի համալսարանում ապրիլի 5-ին մեկնարկել է կոնֆերանս, որը կրում է հետևյալ խորագիրը. «Ռիգայում Սուրբ Գրիգոր Նարեկացու ընթերցումներ. Սուրբ Գրիգոր Նարեկացի. համամարդկային բանալի Արևելքի և Արևմուտքի միջև»: Կոնֆերանսը կշարունակվի նաև ապրիլի 6-ին: Ռիգայում ապրիլի 6-ին տեղի կունենա համերգ` նվիրված Սուրբ Գրիգոր Նարեկացուն: Համերգին կմասնակցի Լատվիայի ռադիոյի երգչախումբը, ինչպես նաև հայ մեցցո-սոպրանո Աննա Մայիլյանը: Երեկոյի ընթացքում կհնչեն նաև Կոմիտասի ստեղծագործությունները:

Միջոցառումները կազմակերպվում են Լատվիայում Հայաստանի մշակույթի օրերի շրջանակներում:

Ապրիլի 4-ին Ռիգայի համալսարանի գրադարանի սրահում բացվել է նաև «Արմենպրես»-ի լուսանկարչական ցուցահանդես: Ներկայացվել են հայկական միջնադարյան եկեղեցական ճարտարապետության կոթողային հուշարձանների բացառիկ լուսանկարներ: 




Այս թեմայով

... վերջին լուր "«Եվրատեսիլ 2015»" թեմայով
Լրահոս

Բոլոր նորությունները    




Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
Яндекс.Метрика
Էջի կարգավորումներ