Շուշիի կերպարվեստի թանգարան 2016թ.-ին ամենաշատ օտարերկրյա այցելուները եղել են ՌԴ-ից, ԱՄՆ-ից, Ֆրանսիայից և ԻԻՀ-ից
ՍՏԵՓԱՆԱԿԵՐՏ, 29 ՄԱՐՏԻ, ԱՐՄԵՆՊՐԵՍ-ԱՐՑԱԽՊՐԵՍ: Շուշիի Կերպարվեստի պետական թանգարանը, Արցախի հասարակությանը հաղորդակից դարձնելով արվեստի բարձրարժեք ստեղծագործություններին, ընդունում է նաև մեծ թվով օտարերկրացի հյուրերի: Այս մասին ասել է Շուշիի կերպարվեստի պետական թանգարանի տնօրեն Լուսինե Գասպարյանը:
«Անցած տարի Շուշիի կերպարվեստի պետական թանգարան է այցելել 2934 մարդ, որից 342-ը` արտերկրից»,- տեղեկացրել է Լ. Գասպարյանը և նշել, որ, ըստ վիճակագրական տվյալների, թանգարան ամենաշատ օտարերկրյա այցելուները եղել են Ռուսաստանի Դաշնությունից, Ամերիկայի Միացյալ նահանգներից, Ֆրանսիայից և Իրանի Իսլամական Հանրապետությունից:
«Թանգարանի առանձնահատկություններից են նվիրատուների հարուստ ցուցակը և ներկայացվող աշխատանքների լայն աշխարհագրությունը. Արցախ, Հայաստան, Վրաստան, ՌԴ, ԱՄՆ, Ֆրանսիա, Եթովպիա, Ինդոնեզիա, Մադագասկար և այլն»,- ասել է Լ. Գասպարյանը:
Բաժանորդագրվեք մեր ալիքին Telegram-ում