ԵՐԵՎԱՆ, 29 ՄԱՐՏԻ, ԱՐՄԵՆՊՐԵՍ: Առաջիկա խորհրդարանական ընտրությունները կարևորագույն հանգրվան են սահմանադրական բարեփոխումներից հետո Հայաստանի ժողովրդավարացման ճանապարհին: Ինչպես հաղորդում է «Արմենպրես»-ը, Մալթայում կայացած Եվրոպական ժողովրդական կուսակցության համագումարի ընթացքում նման հայտարարությամբ հանդես եկավ ՀՀ Նախագահ Սերժ Սարգսյանը:

«Ընդամենը երեք օր հետո Հայաստանում տեղի կունենան խորհրդարանական ընտրություններ: Սա կարևորագույն հանգրվան է սահմանադրական բարեփոխումներից հետո մեր երկրի ժողովրդավարացման ճանապարհին: Հաշվի առնելով երկրի զարգացման առանձնահատկությունները՝ մենք մեր առջև խնդիր ենք դրել վստահ քայլ կատարել եվրոպական մոդելի ժողովրդավարության կառուցման և ժողովրդավարական հաստատությունների հետագա ամրապնդման ուղղությամբ: Մենք հանձնառու ենք և անում ենք հնարավորը՝ անցկացնելու միջազգային բարձր չափանիշներին համապատասխանող ընտրություններ»,- շեշտեց Սերժ Սարգսյանը: Հանրապետության ղեկավարը նշեց նաև, որ ընտրությունները դիտարկելու համար Հայաստանը հրավիրել է միջազգային բոլոր համապատասխան կառույցներին՝ ԵԱՀԿ/ԺՀՄԻԳ-ին, ԵԽԽՎ-ին, Եվրոպական խորհրդարանին, ԵԱՀԿ և ԱՊՀ միջխորհրդարանական վեհաժողովներին: 

«Շնորհակալ ենք Եվրոպական միությանը և, իհարկե, ԵԺԿ-ին՝ Հայաստանի համար այս կարևոր գործընթացներում մեր կողքին գտնվելու համար»,- ամփոփեց ՀՀ Նախագահը: