ԵՐԵՎԱՆ, 23 ՄԱՐՏԻ, ԱՐՄԵՆՊՐԵՍ: ՀՀ կառավարությունը նախատեսում է թեթևացնել Հյուսիս-հարավ ավտոճանապարհի կառուցման վարկային ծավալը և փորձել ներգրավել մասնավոր ներդրողներ: Այդ մասին կառավարության նիստից հետո լրագրողների հետ զրույցում նշեց ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Արթուր Առաքելյանը: «Մինչև հիմա կառուցվել ու շահագործման է հանձնվել 35 կմ ճանապարհ, դրա համար ծախսվել է մոտ 70 մլն դոլար: Այս պահին ծրագրի ավարտի տարեթիվ չենք կարող ասել, որովհետև դա կապված է ֆինանսական միջոցների հետ»,- «Արմենպրես»-ի հաղորդմամբ` ասաց Առաքելյանը՝ ավելացնելով, որ ճանապարհի կառուցումն այս պահին ակտիվ իրագործման փուլում է, ընթանում է Աշտարակից Թալին հատվածի շինարարությունը:

«Մինչև Թալին նախատեսում ենք հասնել 2018 թվականին: Պայմանագիր է կնքված նաև Թալինից դեպի Գյումրի շինարարության համար: Այդ հատվածն ավարտին կհասցնենք 2018-2019 թվականներին, իսկ հետագա տրանշների վերաբերյալ կա հանձնարարություն, որպեսզի թեթևացնենք վարկայի բեռը, հնարավորություններն ակտիվ օգտագործենք՝ մասնավորի ներգրավմամբ որոշակի հատվածներ կառուցելու համար»,- ասաց փոխնախարարը: