Թուրքական ժանդարմերիայի ավելի քան 300 ներկայացուցչի սպառնում է ցմահ ազատազրկում
ԵՐԵՎԱՆ, 22 ՄԱՐՏԻ, ԱՐՄԵՆՊՐԵՍ: Թուրքիայի գլխավոր դատախազությունը դատարանին ժանդարմերիայի 317 ներկայացուցչի նկատմամբ ցմահ ազատազրկման պատիժ կիրառելու պահանջ է ներկայացրել:
Այս մասին, ինչպես հաղորդում է «Արմենպրես»-ը, հայտնում է «Ռիա Նովոստի»-ն:
Ժանդարմերիայի ներկայացուցիչները մեղադրվում են 2016-ի հուլիսի 15-ին Թուրքիայում տեղի ունեցած հեղաշրջման փորձին մասնակցություն ունենալու մեջ:
Թուրքական ԶՈՒ ժանդարմերիայի ուժերը միաժամանակ ունեն իրավապահ մարմնի և ռազմական ուժի գործառույթներ և խաղաղ ժամանակ գործում են ներքին անվտանգության ուժերի բաղադրամասի կարգավիճակով՝ ենթակա լինելով Թուրքիայի ներքին գործերի նախարարությանը:
2016 թվականի հուլիսի 15-ի երեկոյան մի խումբ խռովարարներ ռազմական հեղաշրջման փորձ էին ձեռնարկել: Խռովարարները իրենց հսկողության տակ էին առել մի շարք ռազմավարական օբյեկտներ Անկարայում եւ Ստամբուլում, բայց մի քանի ժամ հետո խռովությունը ճնշվել էր:
Բաժանորդագրվեք մեր ալիքին Telegram-ում