Ռազմաբժշկական ֆակուլտետի կուրսանտին մասնագիտության ընտրության հարցում ոգեւորել են Արցախյան պատերազմի բժիշկները
ԵՐԵՎԱՆ, 23 ՓԵՏՐՎԱՐԻ, ԱՐՄԵՆՊՐԵՍ: Մխիթար Հերացու անվան Երևանի պետական բժշկական համալսարանի ռազմաբժշկական ֆակուլտետի 5-րդ կուրսի կուրսանտ Շահեն Բադալյանի համար ընտրած մասնագիտությունը մեծ պատասխանատվություն է: Նա պատմեց, որ մասնագիտությունն ընտրելու հարցում խթան են հանդիսացել Արցախյան ազատամարտի ժամանակ ռազմական բժիշկների դերն ու գործունեությունը:
«Համալսարանի ընտրությունն առաջնահերթ պայմանավորված է եղել բժշկի մասնագիտություն ունենալու ցանկությամբ, իսկ հենց այս բաժինն ընտրելուն նպաստել է ժամանակին Արցախյան պատերազմի մասին մանրամասն տեղեկանալը, ուսումնասիրելը. այն, թե ինչպես են պատերազմական իրավիճակում ռազմական բժիշկները կարողացել կանգնել մեր զինվորների կողքին՝ բացարձակ չունենալով տարրական պայմաններ: Սա մեծ պատասխանատվություն է իհարկե, եւ մեծ պատիվ է կրել այդ պատասխանատվությունը»,-«Արմենպրես»-ի հաղորդմամբ՝ Վարդանանց տոնի կապակցությամբ կազմակերպված միջոցառման շրջանակում լրագրողների հետ զրույցում ասաց կուրսանտը:
Նա վստահորեն նշեց, որ անհրաժեշտության դեպքում կլինի այնտեղ, որտեղ պետք է, մյուս կուրսանտների հետ միասին կկանգնեն զինվորների կողքին:
«Ապրիլյան պատերազմի ժամանակ եւս շատ կուրսանտներ եւ դասախոսներ դիմել էին մարտական գործողության շրջան մեկնելու համար: Միանշանակ պատրաստ ենք, բայց նախընտրում եմ, պատրաստ լինելով վատին, խաղաղ պայմաններում աշխատել ու ծառայել որպես բժիշկ»,-եզրափակեց Շահեն Բադալյանը:
Բաժանորդագրվեք մեր ալիքին Telegram-ում