Հայաստանը Եվրոպայի կարատեի առաջնությունում բրոնզե մեդալ է նվաճել
ԵՐԵՎԱՆ, 22 ՓԵՏՐՎԱՐԻ, ԱՐՄԵՆՊՐԵՍ: Եվրոպայի կարատեի 44-րդ առաջնությունում Հայաստանը նվաճել է բրոնզե մեդալ:
Այս մասին «Արմենպրես»-ի մամուլի սրահում լրագրողների հետ հանդիպման ժամանակ ասացին Հայաստանի կարատեի ազգային ֆեդերացիայի ներկայացուցիչները:
«Հայաստանի կարատեի ազգային ֆեդերացիան ամեն տարի մասնակցում է միջազգային մրցաշարերի և՝ բավականին հաջող: Մեր ֆեդերացիային անդամակցում են շուրջ 25 ֆեդերացիաներ: Այս առաջնությանը մասնակցում էր նաև Արցախի ֆեդերացիայի ներկայացուցիչը»,-ասաց մամուլի քարտուղար Կարեն Վարդանյանը:
Հավաքականի մարզիչ Վահան Միքայելյանը լիահույս է, որ հայ մարզիկներն աշխարհի գալիք առաջնությունում կկարողանան առավել հաջող հանդես գալ: «Մարզաձևը դարձել է օլիմպիական մարզաձև, և հաջորդ տարի իրավունք կխաղարկվի մասնակցելու 2020 թվականի Օլիմպիական խաղերին»,-նշեց մարզիչը:
Մեծահասակների հավաքականի գլխավոր մարզիչ Տիգրան Մուրադյանը անդրադարձավ նաև նախարարության կողմից տրվող ֆինանսավորմանը: «Լիահույս եմ, որ այս արդյունքներից հետո նախարարությունը կկարողանա մեծացնել մեզ տրվող ֆինանսավորման չափը, իսկ մենք էլ կկարողանանք ավելի շատ մրցաշարեր մասնակցել»,-մատնանշեց նա: Ֆեդերացիայի ներկայացուցիչների խոսքով` Եվրոպայի առաջնությունից առաջ նախարարությունը միայն 8 մարզիկի է տրամադրել մարզահագուստ, սակայն առաջնությանը մասնակցում էին 12 մարզիկներ:
Եվրոպայի առաջնության բրոնզե մեդալակիր Դավիթ Մակյանը (70 կգ քաշային կարգ) հաջողությունը կապում է մարզչական շտաբի լավ աշխատանքի հետ: «Ես այս հաջողությանը հասա մարզիչների, իմ հոր, աշխատանքի, լավ գիտելիքներ շնորհիվ: Հուսամ, վերջինը չի լինի»,-եզրափակեց Եվրոպայի բրոնզե մեդալակիրը:
Եվրոպայի առաջնությունը կայացել է փետրվարի 17-19-ը Բուլղարիայի մայրաքաղաք Սոֆիայում: Առաջնությանը մասնակցել են 50 երկրի ավելի քան 1150 մարզիկներ: Հայաստանը ներկայացել էր 12 մարզիկով:
Բաժանորդագրվեք մեր ալիքին Telegram-ում