ԵԽ զեկուցողն այցելել է Թուրքիայի քրդամետ կուսակցության գրասենյակ
ԵՐԵՎԱՆ, 22 ՓԵՏՐՎԱՐԻ, ԱՐՄԵՆՊՐԵՍ: Եվրախորհրդարանի` Թուրքիայի հարցերով զեկուցող Քեթի Փիրին Անկարայում այցելել է քրդամետ Ժողովուրդների դեմոկրատական կուսակցության գրասենյակ: Ինչպես հաղորդում է «Արմենպրես»-ը, այս մասին տեղեկացնում է թուրքական Demokrathaber-ը:
Փիրին հանդիպել է կուսակցության պատգամավոր Սըրը Սուրեյա Օնդերի հետ: Շուրջ մեկ ու կես ժամ տևած հանդիպման ժամանակ քննարկվել են քրդամետ կուսակցության դեմ իրականացվող բռնաճնշումները:
Թուրքիայի քրդամետ Ժողովուրդների դեմոկրատական կուսակցության համանախագահներ Սելահաթթին Դեմիրթաշը և Ֆիգեն Յուքսեքդաղը, ինչպես նաև կուսակցության անդամ ևս 12 պատգամավոր 2016 թվականի նոյեմբերին ձերբակալվել, ապա կալանավորվել են:
Դիարբեքիրի հանրապետական գլխավոր դատախազությունից հայտնել են, որ ձերբակալվածների դեմ հետաքննություն է իրականացվում «զինված ահաբեկչական խմբավորման անդամ լինելու, հանցագործություն կատարելուն դրդելու և ահաբեկչական խմբավորման քարոզչությունն իրականացնելու» մեղադրանքներով:
Փետրվարի 21-ին հայտարարվել է Ֆիգեն Յուքսեքդաղին պատգամավորական մանդատից զրկելու որոշման մասին:
Բաժանորդագրվեք մեր ալիքին Telegram-ում