ԵՐԵՎԱՆ, 21 ՓԵՏՐՎԱՐԻ, ԱՐՄԵՆՊՐԵՍ: Թուրքիայի քրդամետ Ժողովուրդների դեմոկրատական կուսակցության համանախագահ Սելահաթթին Դեմիրթաշի ազատազրկման ժամկետը երկարաձգվել է ևս 5 ամսով:

Այս մասին, ինչպես հաղորդում է «Արմենպրես»-ը, տեղեկացնում է թուրքական haberler.com-ը:

Դիարբեքիրի F տիպի փակ ռեժիմով բանտում ազատազրկված Դեմիրթաշի ազատազրկման ժամկետը երկարաձգվել է «թուրք ժողովրդին, Թուրքիայի Հանրապետությանը և երկրի պետական մարմիններին վիրավորելու» մեղադրանքով:

Թուրքիայի քրդամետ Ժողովուրդների դեմոկրատական կուսակցության մյուս  համանախագահ Ֆիգեն Յուքսեքդաղին էլ, ով նույնպես ազատազրկված է,  զրկել են պատգամավորական մանդատից:

2016 թվականի նոյեմբերից կալանավորված Յուքսեքդաղի դեմ դատարանի կայացրած որոշումից հետո այն ներկայացվել է մեջլիսին: Փետրվարի 21-ին մեջլիսի նիստի ժամանակ հայտարարվել է, որ Ֆիգեն Յուքսեքդաղը զրկվում է պատգամավորական մանդատից:

Դեմիրթաշից և Յուքսեքդաղից  բացի կալանավորված են կուսակցության ևս 10 անդամ պատգամավոր: