1000х90.jpg (78 KB)

Երևանում՝ 11:07,   28 Մարտ 2024

Իջևանի ճոպանուղու կառուցում, դեղաբույսերի մշակում, տնական գինու շշալցում. Տավուշի ներդրումային ծրագրերը պատրաստ են

Իջևանի ճոպանուղու կառուցում, դեղաբույսերի մշակում, տնական գինու շշալցում. 
Տավուշի ներդրումային ծրագրերը պատրաստ են

ԵՐԵՎԱՆ, 21 ՓԵՏՐՎԱՐԻ, ԱՐՄԵՆՊՐԵՍ: Տավուշի մարզի ներդրումային ծրագրերը պատրաստ են, սպասում են ներդրողների: Ինչպես «Արմենպրես»-ի հետ զրույցում նշեց Տավուշի մարզպետարանի աշխատակազմի զարգացման ծրագրերի և վերլուծությունների բաժնի վարիչ Գուրգեն Հարությունյանը, բազմաթիվ ներդրումային ծրագրեր կառավարության կողմից արդեն հավանության են արժանացել:

Ներդրումային ծրագրեր

Գուրգեն Հարությունյանը նշեց, որ Տավուշում ներդրումներ իրականացնելու համար բազմաթիվ հնարավորություններ կան: Մի շարք համայնքներ հանդես են գալիս իրենց ներդրումային ծրագրերով, կառավարության կողմից հավանության արժանացածների ուղղությամբ ֆինանսական հոսքեր են սպասվում: Գանձաքար գյուղից առաջարկվել է դեղաբույսերի մթերման մշակման, իրացման ծրագրիր: Հաղթանակ գյուղում մտադրություն կա իրականացնել ձիթապտղի մշակում և ձեթի արտադրություն: «Որպես ծրագիր առաջարկվել է Իջևանի կիսակառույց ճոպանուղու վերականգնումը: Այն միանշանակ կնպաստի զբոսաշրջության զարգացմանը: Ճոպանուղու մոտակայքում կա հողատարածք, որտեղ նախատեսվում է կառուցել զբոսաշրջային խոշոր կենտրոն»,-ասաց Գուրգեն Հարությունյանը: Նրա տեղեկացմամբ, Կողբ գյուղից առաջարկվել է ջերմոցային տնտեսության ծրագիր: Նավուր գյուղից առաջարկում են ներդրումներ կատարել մսի մթերման, սպանդանոցի ծրագրում, Վերին Կարմիր համայնքում առաջ են քաշել տնական գինու շշալցման ծրագիրը, Պտղավանում էլ՝ տնկարանային տնտեսության զարգացման ծրագիրը, որ կնպաստի այգեգործության զարգացմանը:

«Արդեն տեղաշարժեր կան, տարբեր գերատեսչություններից ծրագրերի հեղինակներին հրավիրում են քննարկումների, առաջարկություններ ներկայացնում ֆինանսական միջոցների հետ կապված: Ի դեպ, մի արգենտինահայ էր եկել, հետաքրքրված էր Գանձաքարի դեղաբույսերի արտադրամասի և Կոթիի մսի արտադրամասի ծրագրերով: Նա պատրաստ է առանց տոկոսի գումար տրամադրել գյուղացուն բիզնես սկսելու համար:  Ինչպես տեսնում եք այդ ծրագրերի ֆինանսավորման տարբեր մոտեցումներ կան: Չի բացառվում, որ առաջիկայում լինի առաջարկ դրամաշնորհների հետ կապված»,-ասաց Հարությունյանը:

Սոցիալական հարցեր, ենթակառուցվածքներ

Համայնքների խոշորացումից հետո Տարածքային զարգացման հիմնադրամը մի շարք ծրագրեր է իրականացնում: Մասնավորապես, Դիլիջան քաղաքում Տարածքային զարգացման հիմնադրամի կողմից սկսվել է համալիր ծրագիր՝ 850 մլն դրամ արժողությամբ: Խոշորացող համայնքներին պետությունը տարբեր տիպի աջակցություն է ցուցաբերում: Ծրագրերը գործնականում իրականացնում  են հենց իրենք՝ համայնքները: Արդեն ձեռք են բերվել աղբատար մեքենաներ, որոնք իրականացնելու են աղբահանություն: Այդ գումարով նախատեսվում են ցերեկային լուսավորության, ճանապարհների վերանորոգման աշխատանքներ, նախանշված են կրթական ծրագրեր: Առանձին ուշադրություն  է դարձվում զբոսաշրջությանը: Այս ոլորտի զարգացմանն ուղղված նույնպես մի շարք ծրագրեր են նախատեսված:

«Նմանատիպ ծրագիր նախատեսվում է Նոյեմբերյանի երեք փնջերի համար ևս՝ Նոյեմբերյան, Կողբ, Այրում: Դրանից բացի, Տարածքային զարգացման հիմնադրամը Բարագավանում սկսել է ջրամատակարարման բարելավման աշխատանքները՝ 73 մլն դրամ արժողությամբ, այս տարի այդ աշխատանքները կշարունակվեն: Գյուղական տարածքների տնտեսական զարգացման ծրագրի միջոցով էլ մարզի 7 համայնքներում գյուղական զարգացման աշխատանքներ են սկսվել: Իրականացվում է ջրամատակարարման համակարգի կառուցում վերակառուցում Արծվաբերդում, Կոթիում, Այգեձորում, Չինչինում, Հաղարծինում, Նորաշենում»,-հավելեց նա:

Գյուղատնտեսության զարգացման ծրագրեր

Պետական միջոցների հաշվին, ինչպես նախորդ տարի, այս տարի ևս, գյուղացիական տնտեսություններին շուկայականից մատչելի գներով կտրամադրվի ազոտական, կալիումական, ֆոսֆորական պարարտանյութ: Գուրգեն Հարությունյանի խոսքով, ազոտական պարարտանյութը տրամադրվում է 6 հազարով, կալիումականը, ֆոսֆորականը՝ 7 հազարով: Շուկայում գները տատանվում են 9-11 հազարի սահմաններում: Շուկայականից ցածր գներով գյուղացիներին տրամադրվում է նաև դիզելային վառելիք: Աջակցություն է ցուցաբերվում կրծողների դեմ պայքարում: Բուսասանիտարային մասնագետների մոնիտորինգի արդյունքներով ճշտվում է, թե որքան համապատասխան նյութերի կարիք կա և դրանք տրամադրվում են գյուղացիներին:

«Ֆրանսիայի հայկական հիմնադրամն ամեն տարի մոտավոր 400 մլն դրամի ներդրում է իրականացնում գյուղատնտեսության զարգացման նպատակով: Հիմնել են փոքր ֆերմաներ, բարելավվել են ոռոգման ջրամատակարարման համակարգերը: Այդ աշխատանքները կշարունակվեն 2017 թվականին: Ի դեպ, մասնավոր ներդրումներ են ակտիվացել, հատկապես հյուրանոցառեստորանային ոլորտում»,-ասաց մարզպետարանի ներկայացուցիչը:

Անվտանգություն

Մարզի անվտանգության հարցերը ամենաբարձր մակարդակով պաշտոնյաների ուշադրության կենտրոնում են: Ամեն տարի այդ ուղղությամբ աշխատանքներ են նախատեսված: Գուրգեն Հարությունյանը նշեց, որ տարբեր ծրագրերով այս տարի նախատեսված է հենապատերի, այլ անհրաժեշտ շինությունների կառուցում:


Բաժանորդագրվեք մեր ալիքին Telegram-ում






youtube

AIM banner Website Ad Banner.jpg (235 KB)

Բոլոր նորությունները    


Digital-Card---250x295.jpg (26 KB)

12.png (9 KB)

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]