ԵՐԵՎԱՆ, 20 ՓԵՏՐՎԱՐԻ, ԱՐՄԵՆՊՐԵՍ: Հայաստանում պաշտոնապես գրանցված է 972 շինարարական կազմակերպություն, որտեղ աշխատում է շուրջ 13.8 հազար մարդ: Ինչպես տեղեկացնում է «Արմենպրես»-ը` վկայակոչելով ՀՀ ազգային վիճակագրական ծառայության տվյալները, մեր երկրում գործող շինարարական կազմակերպությունների մեծ մասը՝ 660 կազմակերպություն, գերփոքր է՝ ունի մինչև 9 աշխատող:

250 կազմակերպություն դասակարգվում է որպես փոքր՝ 10-49 աշխատող:

Միջին դասակարգված կազմակերպությունները 58-ն են: Այս կազմակերպություններն ունեն 50-249 աշխատող:

Խոշոր կազմակերպությունները, որոնց աշխատողների թիվը 250-ից ավելի է, 4-ն են:

2016 թվականի ընթացքում 972 շինարարական ընկերությունների կողմից հանրապետությունում իրականացվել են 156 մլրդ 460 մլն ՀՀ դրամի շինմոնտաժային աշխատանքներ: Դրանց մեծ մասը բաժին է ընկել միջին և փոքր շինարարական կազմակերպություններին: